„Þetta snýst allt um og ég held við séum öll í þessum slag til að láta gott af okkur leiða og eru miklu meiri líkur til að það gerist undir merkjum Miðflokksins heldur en Flokks fólksins, af því að þið eruð með þessa húrrandi klikkuðu kuntu sem formann Flokks fólksins sem þið ráðið ekki við. […] Komið til okkar og búum til eitthvað ævintýralegt.“

Þetta sagði Bergþór Ólason þingmaður Miðflokksins í hópi með öðrum þingmönnum á Hótel Kvosin við Kirkjutorg. DV hefur undir höndum upptökur en þær voru teknar upp án vitundar þingmanna. Margt sem þar kemur fram er einkamál þingmannanna en annað á erindi við almenning. Viðstaddir voru Sigmundur Davíð Gunnlaugsson, Anna Kolbrún Árnadóttir og Bergþór Ólason, sem öll eru í Miðflokknum, og svo Ólafur Ísleifsson og Karl Gauti Hjaltason úr Flokki fólksins. Á upptökunum má heyra þingmenn úr bæði Flokki fólksins og Miðflokknum ræða mjög tæpitungulaust um stjórnmál og stjórnmálamenn. Var einnig verið að reyna að fá þessa tvo þingmenn Flokks fólksins til að ganga til liðs við Miðflokkinn, á fundinum var Ólafi boðið fjórum sinnum að verða þingflokksformaður Miðflokksins.

Sjá einnig: Bauð Ólafi að verða þingflokksformaður Miðflokksins

Gunnar Bragi Sveinsson segir í samtali við DV að engin alvara hafi verið á bak við það. Þá kemur einnig í ljós af hverju Árni Þór Sigurðsson fyrrverandi þingmaður VG og Geir H. Haarde voru skipaðir sendiherrar á sama tíma.

Sjá einnig: Gunnar Bragi skipaði Árna Þór sendiherra til að draga athygli frá Geir Haarde

Þá bar Ingu Sæland oft á góma og hún sögð hafa „grenjað“ sig inn á þing. Þá sagði Karl Gauti Hjaltason þingmaður Flokks fólksins: „Ólafur er örugglega sammála mér að Inga Sæland getur þetta ekki.“ Þá sagði Gunnar Bragi: „Þið verðið að átta ykkur á að þið getið ekki endalaust látið madame Sæland grilla ykkur eins og þið séuð ekki til.“ Þá bætti Gunnar Bragi við:

„Eruð það þið sem munið njóta næstu kosninga eða Inga?“ Karl Gauti sem er í sama flokki og Inga sagði síðan á öðrum stað að hún gæti ekki stjórnað en hvorki Karl né Ólafur komu formanni sínum til varnar á meðan á samtali þingmannanna stóð. Þá sagði Karl Gauti einnig: „Hún getur grenjað um þetta en getur ekki stjórnað.“

DV hefur undir höndum upptökurnar sem bárust nafnlaust á ritstjórn.