Samkvæmt vefsíðunni Wanderu er Reykjavík næstdýrasta borg í Evrópu. Aðeins Mónakó er dýrari. Úrtakið er 48 borgir og er Reykjavík í 47. sæti.
Í umsögn um Reykjavík er hún sögð meðal kostnaðarsömustu borga Evrópu og gildir einu hvort um kaffibolla eða hótelherbergi sé að ræða.
Hinsvegar er sérstaklega tekið fram að samkvæmt lögum megi nokkurn veginn allsstaðar tjalda hér á landi, jafnvel í görðum fólks, ókeypis. Sú staðhæfing er þó ekki alveg rétt, því ávallt þarf leyfi landeiganda þegar tjaldað er nærri bústöðum manna, samkvæmt 20. grein laga um náttúruvernd.
Bjór í Reykjavík er sá dýrasti í borgum Evrópu. Meðalverð á hálfum lítra innlends bjórs á krana er 9,64 evrur, sem gera um 1200 krónur. Næstdýrasti bjórinn er í Osló, 8,95 evrur, þá er París og Helsinki saman í þriðja sæti, sjö evrur, Kaupmannahöfn, sex evrur, og Stokkhólmur í fimmta sæti, 5,82 evrur.
Til samanburðar er bjórinn 12 sinnum dýrari í Reykjavík en í Kænugarði (Kiev) í Úkraínu, en þar kostar hann 105 krónur íslenskar.
Aðgangseyrir inn á söfn er sá hæsti í Reykjavík, að meðaltali, eða 13,19 evrur, rúmar 1600 krónur. Vín er í öðru sæti, 13,14 evrur, Amsterdam í þriðja, 12,80 evrur, Róm í fjórða, 11,20 og Osló í fimmta, 10,92 evrur.
Hótelkostnaður er sá næstdýrasti í Reykjavík samkvæmt úttektinni, eða 317.65 evrur, rúmar 40.000 krónur. Miðað er við meðaltalsverð fyrir eina manneskju yfir eina nótt, á þeim hótelum hvar mest fæst fyrir peninginn.
Til samanburðar er hótelherbergið dýrast í Mónakó, rúmar 390 evrur nóttin, í þriðja sæti er Dublin á Írlandi, um 280 evrur nóttin, þá Amsterdam í Hollandi á 270 evrur nóttin og Lundúnir í Englandi á 268 evrur nóttin.
Reykjavík er næstdýrust þegar kemur að almenningssamgöngum. Þar er miðað við rútumiðaverð aðra leið í hverri borg, eða 3,70 evrur, eða 4733 krónur.
Vaduz í Liechtenstein er dýrust, 3,88 evrur, Osló í þriðja sæti, 3,68 evrur, Bern í Sviss í fjórða sæti með 3,62 evrur og Stokkhólmur í Svíþjóð með 3,49 evrur.
Þegar miðað er við meðalverð á þriggja rétta máltíð fyrir einn á meðaldýrum veitingastað, er Reykjavík næstdýrust, eða 48,23 evrur, sem gera rúmlega 6000 krónur. Mónakó er dýrust, 50 evrur, Vaduz í Liechtenstein í þriðja sæti, 43 evrur, Bern í Sviss í fjórða sæti, og Osló í fimmta, 42 evrur.
Til samanburðar kostar þriggja rétta máltíð sjö sinnum meira í Reykjavík en í Ankara í Tyrklandi.
Meðalverð á bolla af cappuccino er það næsthæsta í Reykjavík, eða 4,31 evra, eða um 550 krónur. Dýrastur er Kaupmannahafnarkaffibollinn, 4,75 evrur, í þriðja sæti er Osló, um fjórar evrur, þá Bern, 3,85 og loks Helsinki, 3,65 evrur.
Þegar kemur að dýrustu leigubílunum er Reykjavík í fimmta sæti, miðað við meðalverð per kílómetra, eða 2,40 evrur. Dýrasta borgin er Lundúnir, 3,48 evrur.
Rauðu punktarnir eru dýrustu borgirnar, grænu þær ódýrustu.
