Sjálfstæðisflokkur og Framsóknarflokkur renna saman í tveimur af stærstu bæjarfélögum landsins, í Kópavogi og Hafnarfirði. Á báðum stöðum er skipt út Bjartri framtíð – eða leifunum af þeim flokki. En í Hafnarfirði hefði í raun getað haldist óbreyttur meirihluti, því Guðlaug Kristjánsdóttir, bæjarfulltrúi BF komst aftur inn, nú undir merkjum Bæjarlistans. Með Framsókn nær Sjálfstæðisflokkurinn sínum pólitíska bæjarstjóra, Rósu Guðbjartsdóttur í staðinn fyrir hinn utanaðkomandi Harald Líndal Haraldsson. Meirihlutamyndunin í Hafnarfirði tók mjög skamman tíma, var lokið þegar nýbúið var að telja upp úr kössunum.
Hið sama hefði getað verið uppi á teningnum í Kópavogi. Þar fékk sameiginlegur listi BF og Viðreisnar tvo bæjarfulltrúa – og Sjálfstæðisflokkurinn hefði getað haldið áfram að vinna með Theodóru S. Þorsteinsdóttur. Það vildi Ármann Kr. Ólafsson bæjarstjóri, enda þykir hafa gengið afar vel í bæjarmálunum í Kópavogi undanfarin ár.
En þrír bæjarfulltrúar Sjálfstæðisflokksins settu Ármanni stólinn fyrir dyrnar og nú er útlit fyrir að Sjálfstæðisflokkurinn vinni með Framsókn í Kópavogi. Samkvæmt RÚV eru meirihlutaviðræður að hefjast í dag.
Það er jafnvel talað um að horfa þurfi norður í Fjallabyggð eftir einni skýringunni. Þar situr Gunnar I. Birgisson og er bæjarstjóri. Hann hugsar Ármanni þegjandi þörfina síðan hann varð að hverfa úr bæjarstjórninni í Kópavogi um árið. Hermt er að Gunnar hafi þarna aftur farið að beita kröftum sínum í Kópavogi.
Fyrir vikið getur raunin orðið sú að Siglfirðingurinn Birkir J. Jónsson, fyrrverandi þingmaður Framsóknarflokksins á Norðurlandi eystra, taki við sæti formanns bæjarráðs af Theodóru.
Það er svo athyglisvert að Miðflokknum, sem vann góða sigra í kosningunum, er ekki boðið til meirihlutasamstarfs. Og hvað varðar Viðreisn, þá er ljóst að tækifæri til samstarfs milli Sjálfstæðisflokksins og þeirrar stjórnmálahreyfingar hafa ekki verið nýtt. Viðreisn er á leiðinni í samstarf með vinstri flokkum í Reykjavík – svo leiðin milli Sjálfstæðisflokks og Viðreisnar er frekar að lengjast.
