Birgitta Jónsdóttir, einn stofnenda Pírata og fyrrum kafteinn og þingmaður flokksins á Alþingi, segist vera hætt í hljómsveitinni Píratar sem hún stofnaði. Þetta kemur fram á Facebooksíðu Birgittu. Í samtali við Eyjuna sagðist hún hafa hætt fyrir löngu, eða í desember:
„Það er nú langt síðan ég hætti sko, ég setti inn færslu á Twitter í desember, en það bara tók enginn eftir því !“
segir Birgitta og hlær.
„Ég vildi bara gera þetta opinbert með þessum hætti núna, ég minntist á þetta í Harmageddon líka og hef verið að fá einhverjar fyrirspurnir, þannig að nú er þetta orðið opinbert.“
Hún segir margt spila inn í þessa ákvörðun, en aðallega sé það lýjandi að berjast fyrir breytingum gegn ónýtu kerfi:
„Það eru allskonar ástæður. Ég hef reynt að leggja mitt af mörkum til að breyta spilltu kerfi, en það tókst ekki. Ég er vonsvikin með stjórnmálin, almenning, kerfið almennt og Píratar eru ekkert undanskildir, það er alveg sama hversu gott fólk þú setur inn í þetta gallaða kerfi. Enginn flokkur mun geta breytt áratugalangri spillingarhefð Sjálfstæðisflokksins. Það er líka erfitt að fá fólk til að vinna saman og rísa úr sófanum sínum, þar eru svo margir með smápungakomplexa. En kannski verða meiri breytingar eftir næsta hrun, ætli það styttist ekki í það,“
sagði Birgitta.
Hún situr þó ekki auðum höndum, en hún situr í nefnd sem forsætisráðherra skipaði um umbætur á löggjöf á sviði tjáningar-, fjölmiðla- og upplýsingafrelsis, sem hún átti sjálf hugmyndina að.