Frumvarpið um að færa kosningaaldurinn niður í 16 ár í sveitarstjórnarkosningum er farið að valda óróa eftir að hafa verið í hálfgerðu þagnargildi í vetur. Það hefur í gegnum tvær umræður í þinginu, eftir þá þriðju verður það að lögum. Sjálfstæðismenn eru á móti og þeir og Miðflokkurinn hafa í dag verið í einhvers konar málþófi vegna þessa.

Sjálfstæðismenn eru ekki hrifnir af frumvarpinu efnislega, Brynjar Níelsson lét að því liggja í þinginu í dag að annarlegar hvatir kynnu að liggja að baki, eða eins og segir í frásögn mbl.is.

Brynj­ar Ní­els­son þingmaður Sjálf­stæðis­flokks lét að því liggja í ræðu sinni áðan að þeir sem berðust fyr­ir því að þetta frum­varp færi í gegn væru helst þeir sem teldu sig geta grætt póli­tískt á því – þeir sem teldu sig hafa mik­inn stuðning á meðal þess ald­ur­hóps sem öðlast myndi kosn­inga­rétt við breyt­ing­arn­ar.

Semsé að aldurshópurinn sem bætist við muni kjósa aðra en Sjálfstæðisflokkinn. Hver veit?

En það hjálpar ekki að fyrsti flutningsmaður þess er Andrés Ingi Jónsson, VG-þingmaðurinn sem ekki styður ríkisstjórnina. Hann er ekki ofarlega á vinalista Sjálfstæðismanna. Margir í röðum þeirra hugsa honum þegjandi þörvina.

Hugsanlega ber að taka alvarlega viðvaranir embættismanna um að of skammur tími sé til stefnu til að þessi breyting geti orðið að veruleika fyrir sveitrstjórnarkosningarnar í lok maí. Dómsmálaráðuneytið telur að þetta sé óráð.

Þetta mál klýfur ríkisstjórnarflokkana. Það er reyndar ekki allt eins og sýnist, því einn af flutningsmönnum frumvarpsins með Andrési var Áslaug Arna Sigurbjörnsdóttir, ritari Sjálfstæðisflokksins. Og þar er líka Vilhjálmur Árnason, þingmaður flokksins.

Það er ekki auðvelt fyrir Katrínu Jakobsdóttur að setja sig á móti afgreiðslu frumvarpsins nú því fyrir fáum árum var hún sjálf fyrsti flutningsmaður frumvarps um að færa kosningaaldur niður í 16 ár. Hún styður því frumvarp Andrésar, vandræðagemlingsins í flokknum, þvert á vilja stóra samstarfsflokksins. En hugsanlega tekst Sjálfstæðismönnum að koma í veg fyrir að það fari í gegnum þingið, þrátt fyrir að frumvarpið hafi meirihlutafylgi.

En eins og bent hefur verið á mætti, ef frumvarpið yrði samþykkt, einstaklingur kjósa þegar hann er 16 ára, giftast þegar hann er 18 ára og kaupa áfengi þegar hann er 20 ára.