Ritstjórinn Karl Th. Birgisson skrifar ansi beinskeyttan pistil um Pál Magnússon á vefrit sitt Herðubreið, hvar hann lýsir þingmanni Sjálfstæðisflokksins sem skaphundi, sem hafi froðufellt yfir skrifum Braga Páls Sigurðarsonar um landsfund Sjálfstæðisflokksins fyrir Stundina:

„Það er til skýring á froðufellingum Páls Magnússonar vegna pistla Braga Páls Sigurðarsonar í Stundinni (sjá hér og hér. Páll er skaphundur. Ég er ekkert að ljúga þessu upp á hann – hann hefur sjálfur lýst þessum vanda í viðtölum og bætt því við, að æ betur gangi að hafa stjórn á skapinu hin seinni árin.“

Karl segir Pál glíma við skapgerðargalla, sem sé reiðin og henni fylgi dómgreindarbrestur, sem sé skýringin á skrifum Páls um Braga Pál:

„Þessum skapgerðargalla fylgir annar – dómgreindarbresturinn. Reiðin sviptir geðugasta fólk rökhugsun og réttum sjónarhóli. Auðvitað veit Páll af mikilli reynslu að maður á ekki að skrifa í reiðikasti, en í þessu tilviki voru mistökin alvarlegri. Hann er nefnilega formaður allsherjar- og menntamálanefndar alþingis. Undir málasvið hennar falla til dæmis fjölmiðlar, en rekstur þeirra og skipulag fjölmiðlamarkaðarins eru einmitt í deiglu um þessar mundir. Það er þess vegna talsvert alvarlegt þegar formaður þingnefndar bókstaflega frussar út úr sér svívirðingarunum í garð tiltekins fjölmiðils og heimtar af honum afsökunarbeiðni, en telur sig jafnframt vera þess umkominn að fjalla um lög og reglur sem varða jafnvel tilvist þess sama fjölmiðils.“

Segir Karl Th. meðal annars að Páll eigi að hafa vit á því að „grjóthalda kjafti“  og ætti annaðhvort að fara á reiðinámsskeið eða endurmenntun í blaðamennsku.

„Við þessar aðstæður á viðkomandi þingmaður að hafa vit á – svo við tölum nú bara íslenzku – að grjóthalda kjafti, sama hversu honum er misboðið og sama hversu réttan hann telur málstað sinn vera. Góðir þingmenn skilja stað sinn og stöðu.“

Þá réttlætir Karl Th. pistil Braga með skírskotun til álitamála um barnaníðingsmálið, stílbragða Braga Páls, og bókarinnar Fear and Loathing on the Campaign Trail ´72, sem fjallar um Nixon og kosningabaráttu hans, en Karl Th. segir hana láta pistil Braga líta út fyrir „sunnudagsskólasögur.“

Páll Magnússon svarar fyrir sig á Facebooksíðu Karls Th.

Hann segir:

„Hvað varst þú að lesa Kalli minn? Ég skrifaði tvær færslur um þetta mál; eina í gær og aðra í dag. Í hvorugri þeirra er að finna “froðufellingar“ eða “svívirðingarunur“. Ég sagði mína skoðun afdráttarlausa á þeim óhróðri sem ég tel pistil Braga Páls Sigurðarsonar vera og þeim ritstjórnarmistökum sem ég tel Stundina hafa gert með því að birta pistilinn. Eftir á að hyggja hefði ég þó ekki átt að nota hina útjöskuðu og jafnvel klisjukenndu myndlíkingu Jónasar Kristjánssonar um lágkúrulega blaðamennsku, svo hnyttin sem þótti þó þegar hún fyrst var sögð. Ég sé að orðnotkunin í þessari líkingu hefur sært suma sómakæra vini mína og það þykir mér leiðinlegt. Ég hefði átt að sleppa þessu eða nota eitthvað annað orð – t.d. botnfall. Og þetta með reiðina, jú það er rétt hjá þér, ég reiddist Helga Seljan haustið 2013 en verið ágætur síðan, takk fyrir. Ég þakka þér svo þessar ábyggilega vel meintu en yfirlætisfullu ráðleggingar um endurmenntun í blaðamennsku. Ég myndi þó seint ónáða þig Kalli minn ef ég teldi mig þurfa á slíku námskeiði að halda.“