Sigurður Ingi Jóhannsson, samgönguráðherra, segir í Morgunblaðinu að fyrir liggi samkvæmt gögnum að minnst 170 milljarða þurfi í nauðsynlegar vegaframkvæmdir á Íslandi og jafnvel meira. Hann segir mikilvægt að tekið sé heildstætt á málunum en ekki með skyndiaðgerðum. Unnið sé að samgönguáætlun sem ríma eigi við ríkisfjármálaáætlun.

„Mér er fullkunnugt um hve staðan er slæm víða,“ segir Sigurður Ingi í Morgunblaðinu.

Samkvæmt Sigþóri Sigurðssyni, forstjóra verktakafyrirtækisins Hlaðbær Colas, sem sér um margvíslegar malbikunarframkvæmdir, er uppsöfnuð viðhaldsþörf vegakerfisins um 30 milljarðar króna frá hruni. Það hafi verið skorið mikið niður eftir hrun og um 2-3 milljarða hafi vantað upp á á hverju ári síðan en Vegagerðin ver um átta milljörðum til viðhalds vega fyrir árið 2018, þar af fara 3.7 milljarðar í endurnýjun slitlags.

Sigþór segir að ljóst sé að vegakerfið verði alltaf dýrt fyrir svo fámenna þjóð, ekki síst þegar krónunni sé kastað fyrir aurinn:

„Vegagerðin þyrfti að setja tveimur til þremur milljörðum króna meira í ár í viðhaldsframkvæmdir svo einhver viðspyrna næðist. Ég hef í áraraðir rekið fyrirtæki sem sinnir malbikun og finnst sorglegt að sjá hvernig málum er komið. Krónunni hefur verið kastað fyrir aurinn og umhugsunarvert er að frá 2013 hafa ríkisútgjöld aukist um 40% á meðan vegamálin hafa alveg setið á hakanum. Það er líka ljóst að fyrir 330 þúsund manna þjóð verður alltaf dýrt að halda úti vegakerfi í landi sem er 100 þúsund ferkílómetrar. Því hefur stundum verið freistast til þess að nota ódýrari efni og aðferðir við vegagerðina en ella væri og það gengur alveg upp ef vegirnir fá þetta nauðsynlega viðhald. Það hefur hins vegar verið trassað og dýrkeyptar afleiðingarnar blasa nú við,“

segir Sigþór við Morgunblaðið.