Björn Bjarnason, fyrrum ráðherra Sjálfstæðisflokksins, skrifar um landsfund Samfylkingarinnar á heimasíðu sinni um helgina. Segir hann fundinn hafa einkennst af „neikvæðni“ og „óvild í garð annarra“ og ekki hafi komið á óvart að Jóhanna Sigurðardóttir, fyrrverandi forsætisráðherra flokksins, hafi flutt skammarræðu í hátíðarávarpi sínu.
„Neikvæð afstaða Jóhönnu og Loga minnir á innreið Martins Schulz, fyrrverandi leiðtoga og kanslaraefnis þýskra Jafnaðarmanna (SPD). Hann ætlaði að koma, sjá og sigra í landi sínu. Þó leið ekki nema rétt ár þar til honum var varpað á dyr sem mesta fallista SPD frá lokum síðari heimsstyrjaldarinnar. Neikvæð barátta hans beindist gegn Angelu Merkel þar til hann neyddist til að setjast að stjórnarmyndunarborði með henni og hljóp síðan að lokum á sig með því að heimta að verða utanríkisráðherra í stjórn hennar. Það var kornið sem fyllti mælinn í hans eigin flokki. Í morgun (4. mars) voru úrslit í atkvæðagreiðslu um stjórnarsamstarf SPD við Merkel kynnt: 66% samþykktu það en 34% voru á móti.“
Þá nefnir Björn einnig þátt Dags B. Eggertssonar, borgarstjóra. Dagur talaði um að andstæðingar Samfylkingarinnar skorti framtíðarsýn og væru fastir á 20. Öldinni, planið væri fortíðin. Björn snýr þessum orðum upp á Dag sjálfan:
„Þetta eru einmitt orðin sem notuð eru um flokka sem kenna sig við jafnaðarmennsku í Evrópu í upphafi 21. aldarinnar. Dagur B. er sjálfum sér samkvæmur í loftkastalasmíðinni, hún fellur vel að glærumyndasýningunni um að ekki sé húsnæðisskortur undir hans stjórn í Reykjavík.“
Þá segir Björn að Samfylkingin gefi Samgöngustofu afslátt á gagnrýni vegna hergagnamálsins, þar sem Þórólfur Árnason forstjóri Samgöngustofu, sé fyrrum borgarstjóri Samfylkingarinnar:
„Neikvæðnin á landsfundi Samfylkingarinnar var í anda vitlausu spurninga Loga formanns til Bjarna Benediktssonar, formanns Sjálfstæðisflokksins, um vopnaflutninga með flugvélum Atlanta. Logi var með þaulundirbúnar spurningar til þess eins að koma höggi á Bjarna vegna máls sem aldrei hefur verið á hans borði. Það var hins vegar á borði samgöngustofustjóra Þórólfs Árnasonar, borgarstjóra Samfylkingarinnar, eftir að Ingibjörg Sólrún hóf pólitíska eyðimerkurgöngu sína á alþingi. Hvernig halda menn að Samfylkingarfólkið léti væri Þórólfur ekki úr þess röðum? Hann reyndi eins og Logi að skella skuldinni ranglega á ríkisstjórnina.“
