Hér er tillagan sem varð fyrir valinu í samkeppninni um nýbyggingu fyrir Landsbankann sem rísa á milli Hafnartorgsins svokallaða og Hörpu. Þetta virkar eins og nokkuð látlaust hús, ekki jafn gígantískt og Hafnartorgið – alveg ágætlega smekklegt. En kannski ekki sérstaklega tilþrifamikill arkitektúr. Þessi tillaga er frá C.F. Möller og Arkþingi.

Hér er önnur tillaga sem barst Bjarke Ingels Group og Arkiteo. Einn af höfundum hennar er rithöfundurinn Andri Snær Magnason. Þetta er djarfara og þarna er gert ráð fyrir gróðri og möguleikum á útivist.

Bent hefur verið á að þessi tillaga hefði rímað skemmtilega við hugmyndir arkítektsins fræga Jeans Nouvel um tónlistarhúsið – hann stakk upp á því að byggja það innan í hól sem kallaðist á við Arnarhólinn. Það hefði verið býsna frumlegt, en þótti of dirfskufullt.

Svo er hér mynd af höfuðstöðvum Landsbankans eins og þær áttu að líta út eftir samkeppni sem haldin 2007. Þessi bygging verður aldrei reist.

Þá fylgdi þessi mynd með af Björgólfi Guðmundssyni þar sem hann stendur líkt og í stafni bankans, hann er fótósjoppaður inn í óbyggt húsið. Þarna voru endalokin nærri.

En svo eru þeir til sem segja að Landsbankinn eigi ekki að byggja í bænum heldur sé ekkert of gott fyrir hann að flytja bara í stóra tóma húsið í Urðarhvarfi. Það er þá einhvers konar skammarkrókur, því bæði er húsið sérlega óaðlaðandi og svo er nafn götunnar einstaklega nöturlegt – Urðarhvarf.