Michael Gove, breski umhverfisráðherrann sem var í heimsókn á Íslandi nú í vikunni, er einhver einkennilegasti stjórnmálamaður Bretlands. Hann var einn af forystumönnum þeirra sem vildu ganga úr ESB og fór þá afar frjálslega með sannleikann. Gove er einn af höfundum þess kosningabragðs að ljúga því að kjósendum að með útgöngu úr ESB myndu Bretar geta sett 350 milljónir sterlingspunda í heilbrigðiskerfið á viku. Það reyndust ekki vera annað en orðin tóm.

Fræg er yfirlýsing Goves úr kosningabaráttunni þar sem hann sagði að Bretar ættu að hætta að hlusta á álit sérfræðinga. Þeir væru búnir að fá nóg af þeim.

Gove þykir líka vera afar svikull, hann var mikill persónulegur vinur Davids Cameron, sem leit á framgöngu hans í Brexit sem svik við sig. Þá studdi Gove Boris Johnson um hríð, Johnson leit á hann sem bandamann, en eftir strax Brexit söðlaði Gove allt í einu um, deyddi vonir Johnsons um að verða forsætisráðherra, og stökk á vagn Theresu May.

Gove ræddi um það í viðtali í Reykjavík að Bretar gætu lært margt af Íslendingum, enda væri Ísland ekki í ESB. Ísland er hins vegar í EES sem er einmitt það sem myndi kallast mjúkt Brexit – reyndar svo mjúkt að það kemur varla til greina í Bretlandi. Ísland leyfir frjálsa för vinnuafls frá ESB og undirgengst vald Evrópudómstólsins, nokkuð sem harðir Brexitsinnar sætta sig alls ekki við.

Héðan fór Gove svo til Danmerkur að ræða við aðila í sjávarútvegi. Þar sagði hann í dag, þvert á fyrri Brexit yfirlýsingar, að skip frá Evrópusambandinu myndu fá að veiða í breskri lögsögu eftir útgönguna úr ESB.