Norður-Kóreumenn eru að gera sig tilbúna undir að skjóta eldflaug á loft, þetta segja embættismenn innan bandaríska varnarmálaráðuneytisins. Segja þeir að gervihnattamyndir sýni að verið sé að færa til búnað til að geta skotið á loft meðaldrægum eldflaugum. Segir heimildarmaður við CNN að ekki sé talið að þetta tengist hugmyndum Norður-Kóreumanna að ráðast á herstöð Bandaríkjanna í Gúam, en fyrr í dag lýstu Norður-Kóreumenn því yfir að einræðisherrann Kim Jong-Un myndi fylgjast grannt með fyrirætlunum Bandaríkjamanna áður en hann myndi fyrirskipa árás. Líklegast séu Norður-Kóreumenn að undirbúa aðra eldflaugatilraun.
James Mattis varnarmálaráðherra Bandaríkjanna hefur ítrekað að Bandaríkjamenn væru tilbúnir að nota eldflaugavarnarkerfi sitt til að skjóta niður eldflaugar sem Norður-Kóreumenn gætu skotið að þeim eða bandamönnum þeirra. Moon Jae-in forseti Suður-Kóreu hefur hvatt Bandaríkjamenn til að ráðast ekki á Norður-Kóreu án þess að vera búnir að fá samþykki frá Suður-Kóreumönnum.
Í sjónvarpsfréttatíma ríkissjónvarps Norður-Kóreu kom fram að Kim Jong-Un væri búinn að skoða áætlunina um að skjóta eldflaug á herstöð Bandaríkjamanna í „langan tíma“ og væri búinn að ræða málið við sína æðstu hershöfðingja. Hann væri hins vegar að bíða eftir að sjá hvað „heimsku kanarnir“ myndu gera áður en hann myndi taka ákvörðun. Segja sérfræðingar í málefnum Norður-Kóreu að orðalagið bendi til þess að Kim Jong-Un sé tilbúinn að semja um frið en það geti einnig verið að hann sé aðeins að tefja til að gera eldflaugarnar sínar klárar.
George Charfauros öryggisráðgjafi Bandaríkjamanna í Gúam segir að hreyfingar með eldflaugabúnað séu aðeins til þess fallnar að ögra Bandaríkjamönnum þar sem Norður-Kóreumenn viti fullvel að verið sé að fylgjast með öllum þeirra hreyfingum ofanjarðar. Nokkur hræðsla greip um sig í nótt á Gúam þegar tvær útvarpsstöðvar á eyjunni settu óvart neyðarskilaboð í loftið. Ray Tonorio aðstoðarríkisstjóri í Gúam sagði íbúum í morgun að það væri ekkert að óttast:
Það er ekkert sem bendir til þess [að gerð verði árás], miðað við það sem við heyrum.
