Öldungadeild Bandaríkjaþings samþykkti með yfirgnæfandi meirihluta að herða viðskiptaþvinganir á Rússa. 98 þingmenn á móti 2 kusu með frumvarpinu. Nú fer frumvarpið inn á borð Donalds Trump Bandaríkjaforseta, ef hann neitar að skrifa undir þá getur öldungadeildin samt gert frumvarpið að lögum með tveimur þriðju atkvæða.

Sjá frétt: Bandaríkjaþing storkar Trump

Þvinganirnar í frumvarpinu bætast við fyrri viðskiptaþvinganir sem settar voru á Rússa í forsetatíð Barack Obama í kjölfar innlimunar Krímskaga og stuðnings Rússa við uppreisnarmenn í austurhluta Úkraínu. Trump hefur talað fyrir bættum samskiptum við Rússa og hefur Vladímír Pútín Rússlandsforseti sagt að þvinganirnar muni stórskaða samskipti ríkjanna.

Bæði fulltrúadeild og öldungadeild Bandaríkjaþings ögra nú Bandaríkjaforseta með því að ganga gegn stefnumálum hans, bæði með því að herða viðskiptaþvinganirnar á Rússa en einnig með því að hafna afnámi heilbrigðiskerfis Obama, Obamacare. Í kosningabaráttunni síðasta haust lagði Trump mikla áherslu á að leggja kerfið af og setja á fót nýtt heilbrigðiskerfi. Til þess þarf að afnema lögin um Obamacare sem tókst ekki í öldugadeildinni. Það var þó gert með talsvert minni meirihluta en þrír þingmenn Repúblikana gengu í lið með Demókrötum í öldungadeildinni, greiddi 51 þingmaður atkvæði gegn afnámi laganna á móti 49. Þeirra á meðal var John McCain sem sneri aftur á þing þrátt fyrir að glíma við krabbamein, hefur McCain kallað eftir því að þingmenn greiði atkvæði um heilbrigðiskerfið þvert á flokka.