Svavar Gestsson fyrrverandi ráðherra og formaður Alþýðubandalagsins segir stóra lærdóminn við sænska lekamálið vera að ekki eigi að treysta einkafyrirtækjum fyrir staðreyndum sem varða þjóðaröryggi. Lekamálið sænska  snýr að stórfelldum leka á persónuupplýsingum og hernaðarleyndarmálum frá Samgöngustofu Svía sem birt voru í ógáti á netinu, áttu göngin að vera hýst hjá tæknirisanum IBM í Tékklandi. Í kjölfar ríkisstjórnarfundar í morgun tilkynnti Stefán Löfven forsætisráðherra Svía á blaðamannafundi að tveir ráðherrar myndu víkja vegna málsins. Svavar segir þó að stóra fréttin af blaðamannafundinum sé að Löfren telji Svíþjóðardemókratana sem hluta af stjórnarandstöðunni:

Stóra fréttin við endurskipulagningu sænsku stjórnarinnar í dag er að forsætisráðherrann Stefan Löfven telur að Sverigedemokraterna flokkur hægri popúlista, sem sumir kalla fasista, séu hluti af stjórnarandstöðunni,

segir Svavar á Fésbók, hann bætir við:

„Stefan Löfven hefur staðið sig vel sem forsætisráðherra eftir erfiða tíma á bæ Sósíaldemókrata. Í þetta skipti kom í ljós að hin sænska samgöngustofa hafði falið einkafyrirtækjum að sinna verkefnum og fyrirækin höfðu farið óvarlega með upplýsingar sem flokkast undir öryggismál. Þetta notaði stjórnarandstaðan sem hefur með Sverigedemokraterna meirihluta í sænska þinginu. Sósíaldemókratar stjórna áfram með stuðningi Vinstri flokksins.“

Svavar segir að stóri lærdómurinn af þessu máli sé að treysta ekki einkafyrirtækjum fyrir upplýsingum sem varða þjóðaröryggi:

Lærdómurinn er sá að það á ekki að treysta einkafyrirtækjum fyrir staðreyndum sem varða þjóðaröryggi. Útvistun alls konar verkefna var ákveðin í tíð íhaldsstjórnarinnar í Svíþjóð. Þess vegna kom til tals að kæra fjórflokkinn sem að henni stóð fyrir stjórnskipunar- og eftirlitsnefnd sænska þingsins. Þeir flokkar báru pólitíska ábyrgð á útvistuninni sem skók sænska stjórnkerfið síðustu daga. Nú er það veður gengið yfir.