Fulltrúadeild Bandaríkjaþings hefur samþykkt frumvarp sem felur í sér viðskiptaþvinganir á hendur Rússum, en slíkt frumvarp gengur í berhögg við áform Donalds Trump Bandaríkjaforseta að bæta samskipti Bandaríkjanna og Rússlands. Bæði Trump og stjórnvöld í Rússlandi eru mótfallinn frumvarpinu og segja talsmenn stjórnvalda í Kreml að ef frumvarpið yrði að lögum þá myndi það eyðileggja möguleikann á að bæta samband ríkjanna.

Áður en frumvarpið verður að lögum þarf það að fara vera samþykkt af öldungadeildinni og af Trump sjálfum. Samkvæmt BBC liggur ekki fyrir af hálfu Hvíta hússins hvort Trump muni neita að skrifa undir lögin ef þau verða samþykkt af öldungadeildinni, nú sé verið að fara yfir frumvarpið:

Forsetinn er hlynntur hörðum refsiaðgerðum í garð Norður-Kóreu, Írans og Rússlands, en nú er Hvíta húsið að fara yfir frumvarpið og bíður nú eftir að fá gögn til að kynna forsetanum,

sagði Sarah Huckabee talskona Hvíta hússins. Frumvarpið var samþykkt með 416 atkvæðum gegn 3 og lýsir Paul Ryan þingforseti því með eftirfarandi hætti:

Það herðir skrúfurnar á okkar helstu andstæðingum til að halda Bandaríkjunum öruggum.

Frumvarpið er viðbót við refsiaðgerðir á hendur Rússum í kjölfar innlimunar Krímskaga og átakanna í Úkraínu. Felur það í sér viðskiptaþvinganir á hendur evrópskum fyrirtækjum sem eiga í orkuviðskiptum við Rússa, myndi það meðal annars bitna á Nord Stream 2 gasleiðslunni frá Rússlandi til Þýskalands. Þar að auki ættu rússnesk fyrirtæki erfiðara að fá lán til langstíma og eignir ríkisfyrirtækja tengdum námuvinnslu og lestarkerfum yrðu frystar. Einnig kæmi frumvarpið í veg fyrir að forseti Bandaríkjanna geti aflétt viðskiptaþvingununum án aðkomu þingsins.