Keflavíkurflugvöllur er sprunginn vegna mikillar flugumferðar. Það er ljóst að þarf að grípa til einhverra ráða til að stækka flugvöllinn verulega ef menn ætla að anna þeirri umferð sem nú er þar.

Þetta er eitthvað sem ekki verður komist hjá því að gera – sérstaklega í ljósi umræðu um Keflavík sem einhvers konar flugmiðstöð norðursins. Umferðin um hann er þegar orðin álíka mikil og á flugvöllum milljónaþjóða.

Þegar flugstöðin var byggð var umferðin um hana sáralítil miðað við það sem nú er – þá var meira að segja tuðað yfir því sem hún væri of stór. Auðvitað var erfitt að sjá fyrir þá gríðarlegu aukningu sem hefur orðið í farþegaflugi í heiminum – og um íslenska flugstjórnarsvæðið.

En nú skýtur upp þeirri undarlegu hugmynd að fara að nota Reykjavíkurflugvöll líka undir millilandaflug með þotum. Um þennn flugvöll hafa verið deilur áratugum saman, ólíklegt er að hann sé á förum á næstunni – rökin um innanlandsflug til Reykjavíkur og sjúkraflug hafa vegið nokkuð þungt í umræðunni.

Allt öðru máli gegnir um flug með þotum til dæmis frá Bretlandi en flug frá Akureyri og Ísafirði. Ein röksemdin sem er notuð er að London City Airport – þaðan sem British Airways ætla máski að fljúga til Keflavíkur – sé nú í miðborginni í Lundúnum. Og hví þá ekki að hafa miðborgarmillilandaflugvöll í Reykjavík?

En staðreyndin er sú að London City Airport er 15 kílómetrum frá þeirri miðborg Lundúna sem við þekkjum flest og þar sem flestir ferðamennirnir eru, þ.e. West End, Soho og Westminster, eins og sjá má á þessari mynd er drjúgur spölur á flugvöllinn frá þessum stöðum. Ætli þetta sé ekki álíka löng vegalengd og úr Reykjavík í Hvassahraun?