Innflytjendamál eru í deiglunni um víða veröld en umræðan er ekki oft á forsendum innflytjendanna sjálfra og því er nýr listi sem vefsíðan US News and World Report hefur tekið saman um þau lönd sem taka best á móti innflytjendum góð viðbót í umræðuna. Með viðtölum við 21 þúsund innflytjendur víðsvegar um veröld og greiningu á lagaumhverfi og félagslegri þjónustu hefur verið útbúinn listi yfir 80 bestu löndin fyrir innflytjendur.

Samkvæmt tölum frá Alþjóðabankanum eru innflytjendur um 250 milljón talsins í heiminum og eru því þrjár af hverjum 100 manneskjum innflytjendur. Þessi hópur sendi hvorki meira né minna en 582 milljarðar dollara heim til vina og ættingja árið 2015.

Flestir innflytjendur koma frá stærsta lýðræðisríki heims, Indlandi eða 15,6 milljónir samkvæmt gögnum frá Sameinuðu þjóðunum frá 2015. Næst á eftir er Mexíkó en þaðan voru 12,3 milljónir innflytjenda ættaðar. Rússar eru í þriðja sæti með 10,6 milljónir, Kínverjar í fjórða með 9,5 milljónir og í fimmta sæti er Bangladesh með 7,2 milljónir.

Flestir innflytjendur eru í Bandaríkjunum eða 46,6 milljónir og eru þeir 14,5% þjóðarinnar. í Þýskalandi eru innflytjendur 12 milljónir eða 14,9% heildaríbúafjölda, í Rússlandi 11,6 milljónir eða 8,1%, í Sádí-Arabíu eru þeir 10,2 milljónir eða 32,3% íbúa og í Bretlandi eru þeir 8,5 milljónir eða 13,2%.

Efst á listanum er Svíþjóð, í öðru sæti er Kanada, þriðja sæti Sviss, Ástralía í fjórða og Þýskaland í fimmta sæti. Svíþjóð er á toppnum einkum vegna sterks velferðarkerfis en innflytjendur eru um 10% af 9,8 milljónum sem þar búa.