Svo virðist sem þriggja flokka ríkisstjórn Finnlands sé fallin eftir að brestir komu í samstarf flokkanna þriggja sem að henni standa. Þar með er hætta á stjórnarkreppu í Finnlandi.

Miðflokkurinn, Þjóðabandalagið og Sannir Finnar mynda núverandi ríkisstjórn. Þeir hafa starfað saman í henni síðan 2015.

Miðflokkurinn og Þjóðabandalagið treysta sér nú ekki lengur til að vinna með Sönnum Finnum. Sá flokkur fékk nýlega nýjan formann sem kemur yst af hægri væng Sannra Finna sem er flokkur þjóðernissinna. Nýji formaðurinn heitir Jussi Hala-aho. Hann var kosinn formaður á laugardag og þykir umdeildur.

Finnska netfréttaveitan HBL greinir nú frá því að formenn Miðflokksins og Þjóðabandalagsins, þeir Juha Sipilä forsætisráðherra og Petteri Orpo fjármálaráðherra segi að flokkar þeirra vilji nú ekki lengur vilja vinna með Hala-aho í Sönnum  Finnum. Vísað er til samhjóða tísta beggja á Twitter þar sem báðir segja að grundvöllur samstarfs við Sanna Finna sé brostinn:

Keskustelut käyty. Yhteinen esityksemme Kesk./Kok. eduskuntaryhmille: ei edellytyksiä jatkaa yhteistyötä Halla-ahon johtaman PS:n kanssa.

— Juha Sipilä (@juhasipila) June 12, 2017

Keskustelut käyty. Yhteinen esityksemme Kesk./Kok. eduskuntaryhmille: ei edellytyksiä jatkaa yhteistyötä Halla-ahon johtaman PS:n kanssa.

— Petteri Orpo (@PetteriOrpo) June 12, 2017

Hinn nýji formaður Sannra Finna er ekki ráðherra í núverandi ríkisstjórn Finnlands en situr bæði á finnska þinginu og Evrópuþinginu.

Þeir Sipilä forsætisráðherra og Orpo fjármálaráðherra hafa boðað blaðamannafund núna klukkan 14:00 að íslenskum tíma. Talið er að þeir muni nú leita ríkisstjórnarsamstarfs við Sænska þjóðarflokkinn og Kristilega demókrata á finnska þinginu.