Það var dálítið merkileg reynsla að koma í Costco áðan. Nú hef ég lesið um þetta fyrirtæki og skilst að það sé frekar vel þokkað í Bandaríkjunum, borgar skikkanleg laun, veitir starfsmönnum sínum tryggingar og réttindi – er semsagt nokkur andstæða við hið andstyggilega WalMart.

Það var fjöldi manns við búðina, en ekki vandamál að fá stæði eða innkaupakerru. Við þurftum að bíða í röð eftir að fá skírteini, en hún gekk greiðlega fyrir sig. Það var dálítil hátíðarstemming og reyndar var áberandi hvað allir lögðu sig fram um að vera tillitssamir og kurteisir í mannfjöldanum. En almennt voru viðbrögði undrun yfir vöruúrvali sem maður hefur ekki séð á Íslandi áður.

Ég ætla ekki að blanda mér sérstaklega í umræðuna um verð, en manni sýnist að margt sé hægt að fá ódýrara í Costco en annars staðar, sérstaklega ef maður kaupir í miklu magni. Og búðin gengur náttúrlega dálítið út á magninnkaup. Vöruúrvalið er amerískt. Innflutt grænmeti virðist miklu ferskara en maður á að venjast í íslenskum búðum og það sama má segja um ávexti. Það er hægt að gera feykilega góð innkaup á allskyns pakkavöru, að því leyti minnir þetta á Hagkaup eins og var í upphafi. Í dag virkar það eins og Costco sé staðurinn þar sem Íslendingum finnst „skemmtilegast að versla“.

Maður sér því haldið fram að innkoma Costco á íslenskan markað snúist bara um markaðssetningu. En það er ekki rétt. Þessi verslun er öðruvísi en við Íslendingar eigum að vegnjast. Kona sem ég hitti í búðinni var himinlifandi og sagði að næst vonaði hún að hingað kæmi erlendur banki.

Eiginlega fær maður á tilfinninguna eftir að hafa verið í Costco að engin raunveruleg samkeppni hafi verið á íslenskum matvörumarkaði. Verslanakeðjurnar hafi verið ánægðar með að hafa fast og óbreytt ástand, þar sem hver búð hefur sinn stað og sinn verðflokk – og þar sem varla er keppt í úrvali eða gæðum.

Almennt myndi ég segja að það hafi verið jákvæð reynsla að fara í Costco. Ég á eftir að fara aftur, stærðin er slík að ég náði engan veginn að skima yfir allt vöruúrvalið. En þetta er ekki að öllu leyti lágverðsverslun, heldur ægir öllu saman. Ég sá til dæmis Omegaúr á eina og hálfa milljón. Og það sem er hér fyrir neðan myndi kallast lúxusvarningur. (Í framhaldi má benda á vinsælustu Facebook-síðu þessa vors sem nefnist Keypt í Costco – myndir og verð, nú er hún með meira en 37 þúsund fylgjendur.)

Heilt spænskt skinkulæri.

Kavíar.

Vænt stykki af enskum Stiltonosti.

Haloumi ostur frá Kýpur.