ESB er veikburða vegna yfirvofandi útgöngu Breta úr sambandinu og ef Marine Le Pen verður kjörin forseti Frakklands mun það verða til þess að sambandið hrynur endanlega saman. Þetta kemur fram í grein sem Bernard Cazeneuve, forsætisráðherra Frakklands, skrifaði en greinin birtist í dagblaðinu Libération í dag. Í greininni segir Cazeneuve að ESB geti ekki staðið af sér annað áfall á borð við Brexit og það væri þannig áfall ef Le Pen sigrar í forsetakosningunum og við tekur ríkisstjórn sem er á móti aðild Frakklands að sambandinu.

Hann hvetur því franska kjósendur til að styðja Emmanuel Macron í síðari umferð kosninganna en hún fer fram á sunnudaginn. Francois Hollande, forseti, hefur einnig lýst yfir stuðningi við Macron. Hollande er í sósíalistaflokknum. Macron var einnig í sósíalistaflokknum en var ósáttur við stefnu flokksins og stofnaði því flokkinn En Marche.

Hollande er fyrsti forsetinn frá lokum síðari heimsstyrjaldarinnar sem ekki er endurkjörinn. Hann hefur verið mjög óvinsæll meðal almennings og á síðasta ári tilkynnti hann að hann myndi ekki bjóða sig fram á nýjan leik.

Libération, sem er vinstrisinnað dagblað, kemur að vanda út í dag og fylgir 16 síðna aukablað með en aukablaðinu er beint gegn Le Pen og flokki hennar, Front National.

Jótlandspósturinn segir að Les Echos, sem er viðskiptablað, hafi einnig beint sjónum sínum að Le Pen og þeim hættum sem blaðið telur fylgja því ef hún sigrar. Í blaðinu er rætt við forstjóra stórra franskra fyrirtækja sem vara við neikvæðum afleiðingum þess ef Le Pen sigrar.

Le Pen hefur heldur mildað afstöðu sína til ESB undanfarið. Hún hefur meðal annars sagt að það verði ekki í forgangi hjá henni að berjast gegn evrunni, kjósendur verði að ákveða í þjóðaratkvæðagreiðslu hvort hætt verði að nota evruna.