Næstkomandi sunnudag 23. apríl fer fyrri umferð forsetakosninga fram í Frakklandi. Þennan dag mun helsta lýðræðisríki Evrópu líta út eins og hernumið land í stríði.

Hryðjuverkaóttinn hvílir eins og mara yfir Frakklandi og gerir það að verkum að gríðarleg öryggisgæsla verður um land allt.

Norska dagblaðið Aftenposten skrifar að meira en 50 þúsund hermenn verði kallaðir út til gæslu við kjörstaði sem eru um 67 þúsund talsins. Þessi liðsafli er hrein viðbót við þær þúsundir hermanna og öryggislögreglumanna sem þegar eru við störf í Frakklandi.

Óttinn við hryðjuverk í tengslum við kosningarnar hefur ekki minnkað við það að í gær voru tveir menn handteknir í Marseille-borg við Miðjarðarhafið. Reuters-fréttastofan greinir frá því að við leit í íbúð þeirra hafi fundist skotvopn og þrjú kíló af sprengiefni. Mennirnir eru taldir öfgaíslamistar sem styðji hryðjuverkasamtökin sem kenna sig við hið svokallaða Íslamska ríki (IS). Grunur leikur á að þeir hafi ætlað að fremja hryðjuverk nú í aðdraganda fyrri umferðar forsetakosninganna á sunnudag.

Miklar öryggisráðstafanir eru við kosningafundi. Lífverðir gæta allra forsetaframbjóðendanna alla tíma sólarhings. Aftenposten greinir frá því að lögreglumenn í fullum stríðsbúnaði séu ávallt til staðar á kosningafundum Marine Le Pen fulltrúa þjóðernissinna. Fólk verður að ganga gegnum málmleitartæki á leið inn á fundina og strangar reglur gilda um það hvað fólk má hafa með sér. Nokkrum fundum Le Pen hefur verið aflýst þar sem ekki var talið að hægt væri að gæta nægs öryggis. Um páskana var einum kosningafundi íhaldsmannsins Francois Fillons aflýst vegna sprengjuhótunar. Beinar hótanir hafa borist um árásir á Le Pen, Fillon og Emmanuel Macron frambjóðanda miðjuaflanna.

Enn í dag eru neyðarlög í gildi sem frönsk stjórnvöld virkjuðu í kjölfar hryðjuverkanna í nóvember 2015. Þá voru 130 manneskjur myrtar í fjölda árása. Á síðustu tveimur árum hafa um 230 manns týnt lífi í hryðjuverkaárásum í Frakklandi. Aukinheldur skipta þau mörgum hundruðum sem hafa hlotið sár og örkuml. Matthias Fekl dómsmálaráðherra hefur lýst því yfir að nú ríki viðvarandi mikil hryðjuverkaógn í Frakklandi.