Donald Trump Bandaríkjaforseti hringdi í gærkvöldi í Stefan Löfven forsætisráðherra Svíþjóðar og vottaði honum og sænsku þjóðinni samúð sína vegna hryðjuverkarárásinnar í Stokkhólmi á föstudag. Sænska blaðið Expressen greinir frá þessu.
Aðrir þjóðhöfðingjar hafa einnig sett sig í samband við sænska forsætisráðherrann og vottað samúð. Þar á meðal eru Angela Merkel kanslari Þýskalands og Theresa May forsætisráðherra Bretlands.
Í febrúar olli það nokkru írafári þegar Trump minntist á Svíþjóð í ræðu sinni sem hann hélt á fundi með stuðingsmönnum í Flórída. Þar sagði hann:
Við verðum að halda landi okkar öruggu. Sjáið hvað er að gerast í Þýskalandi, sjáið hvað gerðist í gærkvöldi í Svíþjóð. Svíþjóð! Hver hefði trúað því? Svíþjóð! Þessi lönd tóku inn fullt af fólki og glíma nú við vanda sem enginn taldi mögulegan. Lítið á hvað er að gerast í Brussel. Sjáið hvað er að gerast um heim allan. Sjáið Nice, París. Við höfum hleyptu þúsundum, þúsundum fólks inn í land okkar og það var engin leið að skoða þetta fólk, ekkert skjalfest, ekki nokkur hlutur. Svo við ætlum að halda landi okkar öruggu.
Trump hlaut þó nokkrar skammir og háð fyrir þessi orð. Meðal annars spurði Carl Bildt fyrrum forsætisráðherra hvað Bandaríkjaforseti hefði verið að reykja.
Sweden? Terror attack? What has he been smoking? Questions abound. https://t.co/XWgw8Fz7tj
— Carl Bildt (@carlbildt) February 19, 2017
Síðar útskýrði Trump að hann hefði í ræðu sinni verið að vísa til þess að kvöldið sýndi sjónvarpsstöðin Fox News þátt þar sem fjallað var um Svíþjóð og stöðu mála þar í tenglum við málefni innflytjenda og hælisleitenda. Hann hafði horft á þennan sjónvarpsþátt.
