Elsta fórnarlamb hryðjuverkaárásarinnar við breska þinghúsið í Lundúnum síðdegis á miðvikudag var hinn 75 ára gamli Leslie Rhodes. Hann var nýkominn úr augnaðgerð á Sankti Thomas-sjúkrahúsinu þegar hryðjuverkamaðurinn ók á hann á Westminster-brúnni.

Leslie Thomas rifbrotnaði meðal annars. Gat kom á lunga hans, hann missti meðvitund og andaðist.

Hans er nú minnst í Bretlandi sem mannsins sem var gluggaþvottamaður Winstons Spencers Churchill fyrrum forsætisráðherra Bretlands, nóbelsverðlaunahafa í bókmenntum með fleiru.

Eftirlaunaþeginn og barnlausi piparsveinninn Leslie Thomas sá til fjölda ára um þann starfa að þrífa gluggana á Chartwell-setrinu sem var heimili Winstons Churchill og fjölskyldu á síðari hluta ævi hans.

Herra Thomas var að sögn þeirra sem þekktu hann, afar stoltur af þessum hluta starfsferils síns. Síðar stofnaði hann sitt eigið gluggaþvottafyrirtæki og rak það um tuttugu ára skeið áður en hann settist í helgan stein.

Leslie Thomas er minnst sem afar alúðlega en feimins  manns sem vildi öllum vel.

Hann var heiðursmaður í öllum skilingi þess orðs,

segir kona sem þekkti hann.

Það urðu svo að lokum örlög gluggaþvottamanns Winstons Churchill að detta hvorki úr stiga né láta lífið á sóttarsæng, heldur farast með sviplegum hætti á miðvikudag, skammt frá þinghúsinu þar sem hinn gamli vinnuveitandi hans átti margar af sínum glæstustu stundum.