Það hefur verið sagt að Sjálfstæðisflokkurinn á Seltjarnarnesi geti sett kartöflupoka í framboð en samt unnið kosningar þar. Sjálfstæðisflokkurinn hefur alltaf stjórnað á Nesinu – og mun sennilega alltaf stjórna á Nesinu. Fátt getur hnikað því.
En það vekur athygli þegar sjálf bæjarstjórnin á Seltjarnarnesi ályktar gegn áfengisfrumvarpi sem lagt er fram meðal annars af þingmönnum Sjálfstæðisflokksins, nýtur mikils stuðnings meðal Sjálfstæðismanna – það hefur reyndar verið samþykkt á landsfundum Sjálfstæðisflokksins að áfengi skuli selt í almennum verslunum.
Nú kemur þessi harða andstaða úr einu höfuðvígi Sjálfstæðisflokksins. Það er vísað til þess að meirihluti þjóðarinnar sé á móti frumvarpinu, læknar og heilbrigðisstarfsfólk vari við því og að aukið aðgengi að áfengi leiði til meiri neyslu, börn og ungmenni séu þar í hættu. Einnig segir að neysla vímuefna meðal barna og ungs fólks sé mjög lítil á Seltjarnarnesi.
Við eigum að láta hagsmuni og velferð barna og ungmenna njóta forgangs í allri stefnumörkun. Aukið aðgengi að áfengi og áróður í formi áfengisauglýsinga gengur gegn því sjónarmiði.
Þeir hafa sitt Ríki á Seltjarnarnesi sem er talsvert sótt af Vesturbæingum líka, og finnst það greinilega nóg. Margir töldu að á nýju þingi þar sem eru margir nýir þingmenn, sumir ungir að árum, myndi áfengisfrumvarpið eiga greiða leið í gegn. En reyndin virðist ætla að verða önnur – mótstaðan er mikil og þarna úr nokkuð óvæntri átt.
