Alabama er mikið í fréttunum þessa dagana vegna kjörs þingmanns á öldungadeild Bandaríkjaþings. Demókratinn vann naumlega, það eru atkvæði svartra sem tryggja honum kosningu og utankjörstaðaratkvæði. Mikill meirihluti hvítra kjósenda valdi Roy Moore, hinn forstokkaða afturhaldsdurg sem að auki er áskaður fyrir kynferðisbrot gegn ungum stúlkum. Eitt það hryllilegasta við stjórnmál á tíma Trumps er að tortryggni milli kynþátta magnast upp á nýjan leik. Rasismi er aftur orðinn gjaldgengur.
Þarna vakna upp gamlir draugar – sem eru því miður enn með lífsmarki og gott betur. Það var í Alabama að sumar hörðustu orrusturnar í mannréttindabaráttu svartra voru háðar. Demókratinn sem sigraði, Doug Jones, var áður saksóknari og varð frægur fyrir að höfða mál gegn meðlimum Ku Klux Klan sem sprengdu baptistakirkju 1963, þar dóu fjórar stúlkur. Réttarhöldin fóru fram 40 árum eftir þetta hryðjuverk.
Söngvaskáldið Neil Young gerði á sínum tíma frægt lag sem hét einfaldlega Alabama. Þetta var á hinni vinsælu hljómplötu Harvest. Í laginu syngur Young að Alabama hafi mikla byrði á baki sér, en önnur ríki Bandaríkjanna geti hjálpað.
Lag Youngs varð býsna umdeilt. Á plötunni söng hann líka lag sem hét Southern Man. Sumum fannst að þarna gerðist Kanadamaðurinn býsna yfirlætisfullur – en hann hefur reyndar margoft á ferli sínum birt sterkar pólitískar skoðanir. Hljómsveit sem nefndist Lynyrd Skynyrd svaraði Neil Young með lagi sem varð feikilega vinsælt. Sweet Home Alabama heitir það. Þar segir meðal annars að fólk í Suðurríkjunum þurfi ekkert á Neil Young að halda. Svo mátti líka lesa úr textanum stuðning við hinn umdeilda ríkisstjóra George Wallace, en því hefur líka verið haldið fram að textinn sé tvíræðari en svo.
Hér er Lynyrd Skynyrd á tónleikum. Söngvarinn er í bol með mynd af Neil Young. Í bakgrunni er suðurríkjafáni.
