Er ný ríkisstjórn að fæðast – jú, margt bendir til þess. Og nú má greina samhjóm með Vinstri grænum og Sjálfstæðisflokknum. Til dæmis á leiðaraopnu Morgunblaðsins í dag. Þar eru tvær greinar sem eru mjög keimlíkar. Önnur er eftir Steingrím J. Sigfússon, fyrrverandi formann VG, hin er eftir Óla Björn Kárason, þingmann Sjálfstæðisflokksins. Hingað til hafa þeir ekki átt sérstaka samleið í pólitík.
En nú mótmæla þeir báðir orðum sem hafa fallið, meðal annars frá Loga Einarssyni, formanni Samfylkingarinnar, um að í nýju ríkisstjórninni verði ekki flokkar sem teljist sérlega frjálslyndir, frjálslyndið sé að finna annars staðar.
Báðir skrifa þeir um pólitíska merkimiða. Steingrímur:
Ég læt mig hafa það að minnast að lokum á einn fremur saklausan smáfrænda í fjölskyldunni sem er merkimiðapólitíkin. Hún gengur í einfaldleika sínum út á að velja sér sjálfum jákvæða merkimiða.
Óli Björn:
Merkingarlausir merkimiðar
Frjálslyndir, víðsýnir og umburðarlyndir. Þrjú jákvæð orð sem stjórnmálamenn eru gjarnir að skreyta sig með. Merking orðanna er hins vegar litlu meiri eða dýpri en innihaldslausir frasar sem hafa tekið yfir pólitíska orðræðu.