George Soros er fjárfestir, frægastur fyrir atlögu sína að breska pundinu 1992. Hann er ættaður frá Ungverjalandi og hefur lagt fé í ýmis málefni sem mega teljast í frjálslyndu deildinni. Hann hefur meðal annars fjármagnað háskóla í Ungverjalandi sem ríkisstjórnin þar hefur reynt að loka. Stjórn Orbans þykir ekki til sérstakrar fyrirmyndar um lýðræði eða frelsi. Soros hefur líka lagt sitt að mörgum til að vinna bug á flóttamannavandanum í heiminum.

En úr þessu hefur orðið ógurleg grýla, Soros er sagður vera bak við alheimssamsæri. Við fengum að sjá grein í Morgunblaðinu í dag sem er dæmi um þennan málflutning. Maður átti varla von á að þetta bærist hingað til Íslands. Samsæriskenningarnar um Soros eru upprunnar í Austur-Evrópu. Þær hafa líka verið notaðar í Rússlandi – af Vladimir Putin og samherjum hans.

Það er er einna forvitnilegast við þetta – og á sinn hátt áhyggjusamlegast – er að þetta er upprunnið í gyðingahatri. Soros er gyðingur og þetta minnir rækilega á málflutning sem heyrðist í þessum heimshluta á fyrstu áratugum 20. aldar. Sorosvænisýkin kemur upp  í löndum þar sem andúð á gyðingum er landlæg. Fyrir hundrað árum var fókusinn á riti sem kallaðist Úr skýrslum Síonsöldunga. Þetta var ritlingur sem var falsaður af rússnesku keisalögreglunni og átti að sýna fram á samblástur gyðinga um að taka yfir veröldina.

Og alveg eins þá og nú voru ásakanirnar að samsærið gengi út á að taka völdin í fjármálakerifn, guðleysi og afnám siðmenningarinnar. Það var sagt markmið hinna rótlausu gyðinga. Andróðurinn gegn þeim hefur hjómað svona í gegnum aldirnar.