Taugar eru greinilega þandar fyrir kosningarnar sem eru eftir rúman hálfan mánuð.

Steingrímur J. Sigfússon þarf að biðjast afsökunar á því að hafa líkt Sjálfstæðisflokknum við fatlaða á framboðsfundi.

Bjarni Benediktsson liggur undir ámæli fyrir að hafa reiðst yfir fyrirspurn á fundi í Versló og fyrir að hafa skammast út í frétttamenn á 365.

Frambjóðandi Flokks fólksins delerar á kosningafundi á Akureyri og Inga Sæland þarf að setja ofan í við hann.

Benedikt Jóhannesson talar óvarlega í sjónvarpsviðtali. Umsvifalaust er hann settur af sem formaður Viðreisnar og Þorgerður Katrín Gunnarsdóttir tekur við. Sumir segja reyndar að formannsskiptin eigi sér lengri aðdraganda.

Kosningabarátta hefur náttúrlega breyst þannig að frambjóðendur eru eiginlega alltaf í beinni útsendingu. Það er hægt að setja hvert glappaskot á netið með engum fyrirvara og slíkt breiðist út á augabragði. Menn mega ekki missa kúlið eitt augnarblik.

Á morgun rennur út frestur til að skila framboðum. Sigmundur Davíð ætlar að tilkynna endanlega um framboðsmál Miðflokksins og stefnu á morgun.

Sigmundur veit hvernig fjömiðlar virka og telur að með þessu geti hann átt sviðsljósið um helgina.

En það þarf líka að skila listum yfir meðmælendur í hádeginu á morgun, það getur verið seinlegt verk að safna þeim.

Hörður Ágústsson, sem situr í öðru sæti á lista Bjartrar framtíðar í Reykjavík suður, auglýsir eftir meðmælendu á Facebook.

Hæ, ég hef verið frekar duglegur í að spamma ekki Facebook með kosningaáróðri. Mig vantar í staðinn frá ykkur að fá nokkur meðmæli í viðbót svo ég og Björt Framtíð geti boðið fram í Reykjavík Norður og Suður.

Þannig að, ef þú ert raunverulegur vinur minn og býrð í Reykjavík Norður eða Suður þá máttu endilega senda mér línu hér og ég annað hvort keyri til þín í dag eða við mælum okkur mót.