Þessar tvær ljósmyndir sýna borg sem hefur tekið miklum breytingum. Sú fyrri er tekin af tönkum sem sjást á neðri myndinni, þeir voru úti í Örfirisey, við Faxaverksmiðjuna svokölluðu, sem nú er farið að kalla Marshallhúsið. Þarna má sjá verbúðirnar meðfram Grandagarði en bak við þær er ekki annað en sjórinn.
Uppfyllingarnar sem eru komnar þarna á bakvið eru gríðarlega stórar og þar eru í dag alls konar fyrirtæki, meðal annars miðstöð matvöruverslunar í Vesturborginni í Bónus, Krónunni og Nettó. Gísli Hjálmar Ólafsson setti myndina inn á vefinn Gamlar ljósmyndir, en myndin er eftir Jóhannes Haraldsson.
Neðri myndin er aðeins eldri, því þar er enn minni byggð á Grandagarði. Hún mun vera tekin 1950. Faxaverksmiðjan er risin, en þarna sjáum við hvað Örfirisey hefur í raun verið lítil og Grandagarðurinn mjór. Forðum var ekki fært þangað út nema þegar var fjara.
Ægisgarður er á sínum stað, en framar á myndinni er vöruhöfnin eins og hún var áður en hún var flutt inn í Sund. Þarna eru skemmur meðfram hafnarbakkanum en við bryggju liggja skip Eimskipafélagsins, gott ef Gullfoss er ekki þarna fremstur.