„Spennan á Kóreuskaganum hefur ekki verið meiri í áratugi. Yfirlýsingar Bandaríkjaforseta eru einstakar og viðbrögðin frá Pyongyang fyrirsjáanleg, þ.e. frekari hótanir og vígvæðing. Komin er upp mjög þröng og hættuleg staða fyrir alþjóðasamfélagið, sem hefur verið að stigmagnast og minnir óneitanlega á Kúbudeiluna.“

Þetta segir Lilja D. Alfreðsdóttir þingmaður Framsóknarflokksins og fyrrverandi utanríkisráðherra. Segir hún í færslu á Fésbók að ljóst hafi verið í langan tíma að ástandið í Norður-Kóreu sé algjörlega ósjálfbært og þar hafi fólk soltið svo áratugum skiptir:

Alþjóðasamfélagið hefur kosið að líta fram hjá þeirri miklu neyð sökum þess gríðarlega mannfalls sem myndi fylgja stríði á skaganum,

segir Lilja. Samband Bandaríkjamanna og Norður-Kóreumanna hefur versnað til muna að undanförnu í tengslum við eldflauga- og kjarnorkutilraunir Norður-Kóreumanna. Hótaði Trump Bandaríkjaforseti á Twitter að Pyongyang myndi finna fyrir „eldi og brennistein“ ef þeir réðust á sig eða bandamenn sína og hafa yfirvöld í Norður-Kóreu hótað því að ráðast á herstöð Bandaríkjamanna í Gúam.

Síðastliðið laugardagskvöld samþykkti Öryggisráð Sameinuðu þjóðanna hertar viðskiptaþvinganir gagnvart Norður-Kóreu. Segir Lilja að með þeirri ályktun sé verið að einangra Norður-Kóreu fjárhagslega og gert er ráð að útflutningstekjur minnki um þriðjung vegna þessa. Kínversk stjórnvöld hafa í gegnum tíðina átt í miklum viðskiptum við Norður-Kóreu og það sé ljóst að ef einhver árangur eigi að nást í þessari erfiðu deilu verði kínversk stjórnvöld að vera virkir þátttakendur í þeirri vegferð. Lilja birti svo eftirfarandi mynd og segir:

Hér er gervihnattamynd af Kóreuskaganum að næturlagi. Eins og sjá má er algjört myrkur í N-Kóreu sem lýsir best stöðunni. Ólíkt stjórnarfar skýrir þann mikla mun sem er á lífsgæðum á Kóreuskaganum.