Hilmar Þór Björnsson setti þessa mynd inn á vefinn Gamlar ljósmyndir og segir að hún sé tekin af Birni Björnssyni árið 1955. Myndin er greinilega tekin úr Hringbrautarblokkinni og hún sýnir mannfjölda á Melavelli. Á vefnum kemur fram sú tilgáta að þetta sé 17. júní, en þá var haldin síðdegisskemmtun með glímu og íþróttum á Melavellinum. Dagskráin var svofelld:
Kl. 15.30 Mótið sett: Erlendur Ó. Pétursson.
Sýningar og bændaglíma. Stjórnandi: Guðmundur Ágústsson. Glímumenn úr Ármanni og KR.
Frjálsar íþróttir: Keppt verður um bikar þann, sem forseti íslands gaf 17. júní 1954.
Knattspyrnukappleikur milli Austurbæjar og Vesturbæjar.3. aldursflokkur.
Leikstjóri: Jens Guðbjörnsson.
Kynnir: Kristján Ingólfsson.
Það er ýmislegt sem maður tekur eftir á þessari mynd. Þjóðminjasafnið er nýlega risið. Bílakosturinn er nokkuð gamaldags. Borgin er algjörlega trjávana. Það vantar grenilundinn á horni Hringbrautar og Suðurgötu, hann var farinn að spretta þegar ég óx upp í þessu hverfi nokkru síðar; Öskjuhlíðin er líka án trjágróðurs og sést greinilega í tankana uppi á henni. Þetta hefur líklega verið fremur kalt vor því Bláfjöllin eru enn snævi þakin.
Fremst á myndinni er blómabúðin sem enn er á horni Hringbrautar og Birkimels. Hún var í þessu húsnæði alveg fram á síðasta ár, nú er þarna risið nýtt og fallegt hús utan um reksturinn. Blómatorgið, eins og það heitir, tók til starfa þarna árið 1949, eigandinn var Sigurður Guðmundsson garðyrkjumaður, en áður mun hann hafa stundað torgsölu, meðal annars á Óðinstorgi. Það var Gunnar Thoroddsen borgarstjóri sem gaf leyfi fyrir því að þarna yrði sett upp blómabúð. Hún hefur þjónað Vesturbænum vel í hartnær 70 ár.
Lengi vel var þarna við hliðina á vinsæl sjoppa sem nefndist Birkiturninn. Þar var varningurinn seldur út í gegnum lúgu og oft mikil umferð þarna í kring. Nándin við Melavöllinn spillti ekki fyrir. Þessi hús má greina á ljósmynd sem ég birti hér á síðunni í fyrra.
