Færeyska Lögþingið hefur nú til umfjöllunar frumvarp til nýrra laga um sjávarútveginn. Þar verður erlendum aðilum verður meðal annars bannað að eiga hluti í færeyskum sjávarútvegsfyrirtækjum. Gefinn verður fjögurra ára aðlögunartími til að hreinsa erlent eignarhald úr færeyska útveginum. Eftir það skulu einungis einstaklingar búsettir í Færeyjum og fyrirtæki skráð þar, hvoru tveggja til fullu skattskyld þar í landi, mega öðlast nýtingarétt á færeyskum veiðiheimildum.
Færeyska útvarpið greinir nú frá því að þetta frumvarp valdi írafári á æðstu stöðum bæði á Íslandi og í Hollandi. Nú hringi símar á skrifstofu færeyska lögmannsins, sem er ígildi forsætisráðherra, og þangað berist bréf utan úr heimi. Þetta sýni skjalaskrá lögmannsskrifstofunnar sem er stjórnarráð þeirra Færeyinga.
Það séu þeir Mark Rutte forsætisráðherra Hollands og Guðlaugur Þór Þórðarson utanríkisráðherra Íslands sem standi fyrir þessu.
Í skjalayvirliti frá Løgmansskrivstovuni sæst, at málið um at fáa útlendingar úr føroysku fiskivinnuni hevur fingið Mark Rutte, forsætisráðharra í Hollandi, og Gudlaug Thór Thórdarson, uttanríkisráðharra í Íslandi, at ressast við,
skrifa fréttamenn færeyska útvarpsins – Kringvarp Føroya.
Færeyskir fjölmiðlar munu einnig hafa greint frá því að Unnur Brá Konráðsdóttir forseti Alþingis og þingkona Sjálfstæðisflokksins í Suðurkjördæmi hafi hringt í færeyska stjórnmálamenn til að ræða þessi mál.
Tilefni alls þessa er að hollensk og íslensk fyrirtæki eiga verulega eignarhluti í stórum útgerðafyrirtækjum í Færeyjum. Hollendingar eiga í hinu rótgróna JFK í Klakksvík. Íslenska sjávarútvegsfyrirtækið Samherji er síðan stór eigandi í færeyska útvegsfyrirtækinu Framherja.
Mark Rutte forsætisráðherra Hollendinga hefur átt símafund með Aksel V. Johanesen lögmanni Færeyja og Guðlaugur Þór Þórðarson mun hafa skrifað færeyska atvinnuvegaráðherranum bréf.
Þessi tíðindi valda titringi í Færeyjum. Árni Dahl rithöfundur, ritstjóri og virtur menningarfrömuður til áratuga skrifar til að mynda grein á vef færeyska blaðsins Norðlýsið, sem er gefið út í Klakksvík. Þar spyr hann hvað valdi því að erlendir stjórnmálamenn á æðstu stöðum skipti sér nú af lagasetningu sem varði færeyskan sjávarútveg? Hann spyr hvort ástæðan geti verið sú að hollenskir og íslenskir peningamenn raki saman auðæfum úr auðlindum sem séu eign færeysku þjóðarinnar?
Árni Dahl spyr einnig hvort færeysk launþegafélög og færeyskir stjórnmálaflokkar ætli að sætta sig við að útlendir stjórnmálamenn hafi með þessum hætti afskipti af lagasetningum í Færeyjum?
Verði frumvarpið að lögum mun það taka gildi 1. janúar 2018. Eftir það byrjar klukkan að tifa og útlendingarnir hafa fjögur ár til að draga sig alfarið út úr eignarhaldi í færeyskum sjávarútvegi.
