Costco kemur á markað á Íslandi, tekur til sín mikið af veltu í matvöruverslun og bensínsölu. Stóru íslensku aðilarnir á þessum markaði bregðast við með því að þjappa sér saman. Hagar kaupa Olís og N1 kaupir Festi sem rekur meðal annars Krónuna og Elko.
Costco áhrifin eru slík að maður sér ekki annað en að þessi fyrirtæki verði að lækka verð hjá sér. Samkeppni hér hefur verið í algjöru skötulíki. Einkenni hennar hefur verið að ein búð fær að hafa lægsta verðið, sú næsta er ögn dýrari, svo koll af kolli þar sem komið er upp í rándýrustu búðir. Bónus er aðeins ódýrari en Krónan sem er ódýrari en Hagkaup. Menn hafa gætt þess að hrófla ekki við þessu.
Á olíumarkaðnum hefur samkeppnin falist í því að hreyfa verðið ögn á litlu bili sem er stranglega afmarkað. Frá því hefur ekki verið brugðið.
Lesandi síðunnar sem þekkir vel til í verslun sendi eftirfarandi línur:
Það er komin forsenda fyrir byltingu í verðlagsmálum á Íslandi. Nú geta dagvörukaupmenn á horninu keypt margar vörur á miklu lægra verði en heildsalar og framleiðendur bjóða þeim í dag og einnig lægra en verðið er þar sem margir þeirra gera sín innkaup, semsagt í Bónus.
Nú lenda heildsalar og sumir framleiendur í vanda. Hingað til hafa þeir verið neyddir með alls konar hótunum að veita einokunarfélögunum (fákeppni) ósanngjarna risaafslætti sem hafa svo, til að skila hagnaði, leitt af sér óeðlilega hátt verði til allra annara.
Sem stendur geta bara kaupmenn á Stór-Reykjavíkursvæðinu nýtt sér þennan kost með góðu móti. Það ber að hvetja fyrirtækið Costco að bjóða uppá netverslun eða heimsendingaþónustu svo sem flestir geti tekið þátt í veislunni.
Tveir aðal fjölmiðlarnir, Fréttablaðið og Morgunblaðið, hafa lítið farið út í greiningar á stöðunni enda báðir aðilar hagsmundatengdir, annars vegar Jón Ásgeir og hins vegar kvótakonan í Vestmannaeyjum sem hefur gert stórinnkaup á heildsölum og framleiðslufyrirtækjum í dagvöru. En þar sem menn hafa gert sínar greiningar, t.d. hjá FÍB, er útkoman sú sama, nefnilega að það hefur verið okrað á okkur í langan tíma. Þetta getur leitt til enn minni verðbólgu og þar með betri kjara á verðtryggðu lánunum.
