Í lok síðustu viku hækkaði bensínverð í Pyongyang, höfuðborg Norður-Kóreu, um 83 prósent. Þetta segja samtök sérfræðinga sem fylgjast með ástandinu í þessu harðlokaða landi. Þessi mikla verðhækkun hefur kynt undir vangaveltum um að Kínverjar séu að herða stefnu sína gagnvart Norður-Kóreu en mörg önnur ríki hafa lengi þrýst á Kínverja að gera það. Forsetar Kína og Bandaríkjanna funduðu í Flórída fyrr í mánuðinum og hafa ræðst við í síma eftir það en Bandaríkjaforseti hefur hvatt Kínverja til að taka upp harðari stefnu gagnvart Norður-Kóreu.
BBC segir að samkvæmt frétt NK News þá hafi hækkunin á eldsneytisverði verið jafnmikil á bensíni og díselolíu og hafi orðið vegna orðróms um að Kínverjar séu að íhuga að hætta sölu á hráolíu til Norður-Kóreu.
Útlendingar í Pyongyang veittu því eftirtekt að bíleigendur streymdu á bensínstöðvar til að fylla eldsneytistanka bíla sinna. Bensínstöðvar byrjuðu að skammta bensín og sumar lokuðu jafnvel alveg. Á einni bensínstöð fengu aðeins bílar diplómata og alþjóðlegra samtaka bensín eftir því sem AP segir. Einnig voru raðir á bensínstöðvum mun lengri en venjulega og verðið hærra.
Í viðræðum Donald Trump, Bandaríkjaforseta, og Xi Jinping, forseta Kína, voru málefni Norður-Kóreu rædd en Trump hefur verið harðorður í garð Norður-Kóreu undanfarið. Hann hefur meðal annars sagt að Kínverjar verði að gera meira í málum Norður-Kóreu til að hafa hemil á vopnaskaki stjórnvalda þar í landi. Hann hefur meðal annars sagt á Twitter að Kínverjar muni eiga betri viðskipti við Bandaríkin ef þeir hafa hemil á Norður-Kóreu.
Kínverjar virðast hafa áhyggjur af að stríð sé við það að brjótast út í bakgarði þeirra en þeir gætu varla setið aðgerðarlausir hjá ef til átaka kemur. Af þeim sökum er ekki útilokað að Kínverjar séu að skrúfa fyrir olíustreymið til nágranna sinna í Norður-Kóreu. En það er heldur ekki hægt að útiloka að þeir sárafáu, sem eiga bíla í Norður-Kóreu, hafi fyllst ótta um að Kínverjar ætli að skrúfa fyrir olíuflæðið og hafi ákveðið að birgja sig upp af þeim sökum. Einnig getur verið að herinn hafi beðið um meira eldsneyti eða að eitthvað hafi farið úrskeiðis í dreifingu eldsneytis.
En hver sem orsökin er þá sýnir þetta hversu mikil áhrif og jafnvel völd Kína getur haft yfir Norður-Kóreu.
Hins vegar er óvíst hvaða áhrif það mun hafa á stjórnvöld í Norður-Kóreu ef Kínverjar loka alveg fyrir streymi hráolíu til landsins. Einræðisstjórnin hefur margoft sýnt að hún er algjörlega óútreiknanleg og hefur hún meðal annars haft í hótunum við Kínverja og sagt að þeir muni gjalda þess ef þeir taka þátt í viðskiptabanni gegn landinu. Talið er að olíubirgðir til þriggja mánaða séu til í Norður-Kóreu.
