Yfirvöld í Norður-Kóreu vinna nú hörðum höndum að gerð eldflauga sem drífa til Bandaríkjanna en eiga fyrir ógrynni vopna sem ná til nágrannalandsins Japans. Spennustigið á Kóreuskaganum fer hækkandi dag frá degi og hafa yfirvöld í Japan því beint þeim tilmælum til þegna sinna að vera reiðubúnir.

Ef Norður-Kóreumenn senda á loft flugskeyti geta þau verið komin á áfangastað innan 10 mínútna. Því hefur skrifstofa forsætisráðherra Japan gefið út uppfærðar leiðbeiningar um það hvernig óbreyttir borgarar skuli bregðast við ef þau tíðindi berast. Washington Post greinir frá.

Þrjú af þeim fjórum flugskeytum sem Norður-Kórea skaut á loft þann 6. mars síðastliðinn lendu í efnahagslögsögu Japan í Japanshafi en það skilur að Japan og Kóreuskagann. Yfirvöld í Pyongyang sögðu síðar að þessum flugskeytum hefði verið skotið upp til að æfa það að hitta herstöðvar Bandaríkjanna í Japan.

Það eru komin næstum 20 ár síðan að Norður-Kórea sýndi fram á að þeir gætu skotið flugskeytum á Japan en árið 1998 skutu þeir upp Taepong-1 flugskeyti sem þeir sögðu að væri notað til að skjóta á loft gervihnöttum. Það dreif lengra en Japan og lenti Kyrrahafsmegin efnahagslögsögu þeirra.

Ráðin sem borgarar fá eru ekki mjög hughreystandi. Þú færð sennilega ekki viðvörun tímanlega en ef þú ert svo heppin/n, farðu þá í næsta vel byggða hús.

This is the Japanese government’s advice for what to do if a North Korean missile is coming straight at you https://t.co/2YpgLsLmji pic.twitter.com/7dmYDHpnCl

— Anna Fifield (@annafifield) April 25, 2017

Heimsóknir á heimasíðu almannavarna í Japan hafa aukist gríðarlega undanfarin misseri eftir því sem Norður-Kóreumenn skjóta upp fleiri flugskeytum og tjá sig meira í fjölmiðlum. Þær voru að jafnaði 400 þúsund á mánuði en í apríl hafa þær farið upp í 5,7 milljónir.