Emmanuel Macron og Marine Le Pen komust áfram í síðari umferð forsetakosninganna í Frakklandi en fyrri umferðin fór fram í gær. Úrslitin marka ákveðin þáttaskil í frönskum stjórnmálum og sýna það mikla vantraust sem kjósendur bera til hins hefðbundna pólitíska kerfis í landinu og hinna hefðbundnu stjórnmálaflokka. Í fyrsta sinn í sögu fimmta lýðveldisins eiga gömlu flokkarnir ekki frambjóðanda í síðari umferðinni.

Frambjóðendur sósíalista og íhaldsmanna biðu lægri hlut fyrir Macron og Le Pen í gær. Marine Le Pen, leiðtogi Front National, fékk um 22 prósent atkvæða í kosningunum en Emmanuel Macron, frambjóðandi En Marche!, fékk um 23 prósent atkvæða. Þau berjast því um sigurinn í annarri umferð kosninganna sem fer fram 7. maí næstkomandi.

Macron er 39 ára og frekar reynslulítill í stjórnmálum. Á aðeins sex mánuðum tókst honum að ná vel til kjósenda og þykir nú líklegur til að verða næsti forseti Frakklands en samkvæmt skoðanakönnunum mun hann sigra Le Pen með töluverðum mun og hljóta um 60 prósent atkvæða. En það er þó kannski of snemmt að afskrifa Le Pen og nægir þar að benda á óvæntan sigur Donald Trump í bandarísku forsetakosningunum síðasta haust og úrslit Brexit kosninganna.

Francois Fillon, frambjóðandi íhaldsmanna, fékk 20 prósent atkvæða í gær. Þegar hann viðurkenndi ósigur sinn sagði hann að nú væri ekkert annað í stöðunni en að kjósa gegn öfgahægrivængnum og átti þar við Le Pen. Hann lýsti yfir stuðningi við Macron og sagðist kjósa hann í síðari umferðinni. Það sama gerði Jean-Claude Raffarin, fyrrum forsætisráðherra íhaldsflokksins, en hann hvatti alla „lýðræðissinna“ til að kjósa Macron.

Macron er stuðningsmaður ESB en Le Pen er mjög á móti ESB. Þau hafa ólíka sýn á framtíð Frakklands. Le Pen horfir mjög til fyrri tíðar og vill Frakkland úr ESB og gera landið að sterku þjóðríki sem byggir á glæstri fortíð. Macron hefur á hinn bóginn talað um að leiðin liggi fram á við og hefur reynt að veita fólki von um að góðir tímar geti verið framundan.