Rodrigo Duterte forseti Filippseyja er orðinn heimsfrægur fyrir orðfæri sitt og hörku í baráttunni gegn vímuefnum. Hann hefur kallað Barack Obama fyrrum Bandaríkjaforseta tíkarson og líkt sjálfum sér við Hitler.

Nú hefur hann lýst því yfir að hann muni leggja sér til munns þá hryðjuverkamenn sem yfirvöld í landinu handsami. Forsetinn flutti opnunarræðu á stóru íþróttamóti á Filippseyjum síðastliðinn sunnudag þar sem hann lét gamminn geysa eins og honum einum er lagið. Bloomberg greinir frá.

Hann hefur þó aldrei gengið jafn langt og nú í yfirlýsingum. Nýlega gerðu íslamistar tilraun til hryðjuverkárásar í Bohol héraði og gaf Duterte þá fyrirskipun um að skjóta skyldi árásarmennina á flótta. Hann kallaði hryðjuverkamennina „dýr“ og sagði auk þess:

Ég get verið fimmtíu sinnum illskeyttari en þeir…Gefið mér edik og salt og ég borða í þeim lifrina.