Hann er skrítinn þessi febrúar. Líkt og vorblíða flesta daga. Væri hægt að kalla þetta falskt vor?

Vorlaukar spretta upp úr jörðinni í Vesturbænum og eru brátt að fara að blómgast.

Brum er farið að vaxa á trjám.

Gras grænkar upp við gamla steinvegginn í garðinum hjá mér.

Og í morgun lá skringileg þoka yfir bænum, í afskaplega stilltu og mildu veðri. Ég brá mér í líki túrista, fór út á Skólavörðustíg og tók mynd upp götuna að Hallgrímskirkju sem sást óljóst í þokunni.

Annars er það orðið þannig í Miðbænum að ef maður sér Íslending þar á gangi heilsar maður honum sérstaklega eða kinkar til hans kolli – við erum orðnir svo fáir og strjálir innan um ferðamennina að við skerum okkur úr.