Í grein eftir Mikhail Gorbachev, fyrrum forseta Sovétríkjanna og höfundar bókarinnar The New Russia, sem birtist á vef Time.com í gær segir hann að svo virðist sem heimsbyggðin sé að undirbúa sig undir stríðsátök.

Í greininni segir hann að heimurinn glími við svo mörg vandamál í dag og að stjórnmálamenn virðist vera ringlaðir og viti ekki hvert skal stefna. Hann segir að stærsta vandamálið í dag sé hervæðing stjórnmálanna og nýtt vopnakapphlaup. Það verði að vera algjört forgangsverkefni að stöðva þessa þróun og snúa henni við því núverandi ástand sé alltof hættulegt.

Hann segir að á sama tíma og bæði NATO og Rússar fjölgi hermönnum, skriðdrekum og öðrum vígtólum í Evrópu þá eigi ríkisstjórnir í vanda við að fjármagna útgjöld til að standa undir lágmarksþörfum fólks.

„Stjórnmálamenn og herforingjar virðast verða sífellt herskárri og varnarmálakenningar sífellt hættulegri. Fréttaskýrendur og sjónvarpsfólk bætist í þennan herskáa hóp. Það er eins og heimurinn sé að undirbúa sig fyrir stríð.“

Gorbachev rekur síðan samkomulag Sovétríkjanna og Bandaríkjanna um fækkun kjarnorkuvopna og að á fundi stórveldanna í Genf í nóvember 1985 hafi leiðtogar ríkjanna orðið sammála um að ekki væri hægt að sigra í kjarnorkustríði og að slíkt stríð mætti aldrei há.

Hann segir að ógning af kjarnorkuvopnum virðist vera orðin staðreynd á nýjan leik og að samband stórveldanna hafi farið versnandi undanfarin ár. Talsmenn hernaðarhyggju og hergagnaiðnaðarins nuddi saman höndum af ánægju vegna þessa. Gorbachev segir að það verði að brjótast út úr þessari stöðu og taka upp pólitískar viðræður til að geta tekið sameiginlega ákvarðanir og aðgerðir.

„Í nútímaheiminu verður að gera stríð útlæg því ekki er hægt að leysa þau alþjóðlegu vandamál, sem við stöndum frammi fyrir, með stríði – ekki fátækt, ekki umhverfismál, flóttamannavandann, fólksfjölgun eða skort á auðlindum.“