1977 brann svokölluð Móhúslengja sem stóð meðfram Skólastrætinu. Ég birti eitt sinn mynd af henni, hún er eftir hinn ástsæla upptökustjóra Sjónvarpsins, Tage Ammendrup. Þarna standa þessi gömlu hús, heldur óhrjáleg, en viðendann er verslunarhúsnæði sem KRON hafi til afnota, þar var um tíma bókabúð KRON sem þótti nokkuð menningarleg.
Þessi húsalengja brann til kaldra kola árið 1977, en í staðinn voru byggð hús sem falla svosem ágætlega að umhverfinu, eru í stíl sem á að virðast nokkuð gamall, en fá svosem aldrei nein verðlaun fyrir fegurð eða þokka.
Myndirnar sýna hvernig umhorfs var eftir brunann. Á efri myndinni er verið að ryðja burtu brunarústunum en einnig sjáum við að hús KRON sem vissi út í Bankastrætið fær að fjúka.
Á neðri myndinni sjáum við húsið þar sem nú er veitingastaðurinn Lækjarbrekka. Endurbygging þess hófst árið 1980. En þetta var frægt hús, það var reist árið 1834 af danska kaupmanninum P.C. Knutzon. Hann kemur nokkuð við sögu í sjónvarpsþáttum sem við Guðjón Friðriksson erum að gera.
Síðar hafði Bernhöft bakari aðsetur þarna, og þess vegna er tilkomið nafnið Berhöftstorfa en einnig var gatan upp holtið kölluð Bakarabrekka – sem síðar varð Bankastræti. Nú væri réttara að kalla hana Flísstræti, því enginn er bankinn þar lengur.
Þessar merkilegu myndir af brunarústunum tók Jón H. Hólm. Hann gaf mér góðfúslegt leyfi til að birta þær.
