Það eru 80 ár í dag síðan franska rannsóknaskipið Pourquoi pas fórst á Mýrum í miklu ofviðri. Aðeins einn maður komst lífs af, hásetinn Eugene Gonidec. Þetta var stóratburður á sínum tíma. Finnbogi Rútur Valdimarsson, sem síðar var alþingismaður og bankastjóri, var þá ritstjóri Alþýðublaðsins. Hann hafði dvalið erlendis, meðal annars í Frakklandi, og kom heim með nútímalegar hugmyndir um framsetningu frétta, fyrirsagnir og nokun ljósmynda.

Alþýðublaðið þótti lifa blómaskeið undir stjórn Finnboga, það náði rækilega að skáka hinum blöðunum. Efnistökin má glöggt sjá í frásögnunum af Pourquoi pas slysinu. Frásagnirnar eru lifandi og framsetningin sterk. Finnbogi fór sjálfur á slysstað í Straumfirði, talaði við fólk, og tók ljósmyndir. Þar á meðal er ein frægasta fréttamynd Íslandssögunnar, myndin sem má sjá hér nokkru neðar, þar liggja lík skipverjanna í röð, fremstur er skipstjórinn Jean Baptiste Charcot.