Þórarinn Eldjárn opnar vefsíðu um ritstörf sín og -verk. Slóðin er einfaldlega thorarinn.eldjarn.is.
Efst á síðunni er að finna sögu úr nýju smásagnasafni eftir Þórarin sem kemur út í haust og nefnist Þættir af séra Þórarinum og fleirum.
Sagan heitir Uppstilling ehf. Þarna er tenging við prófkjör stjórnmálaflokka sem hafa valdið svo mikilli úlfúð undanfarið. Hér er málsgrein úr henni:
Nú þegar þessu kerfi væri ógnað af upplausnaröflum og það talið komið að fótum fram ef marka mætti kannanir og almannaróm með sinn „kraumandi og viðbrunna austurvelling“, þá væri vissulega kominn tími til að spyrna við fótum. Eftir að hafa legið yfir málinu hefði hann komist að því hvar vandinn lægi. Semsé: það mannval sem safnaðist á framboðslista flokkanna væri ósköp einfaldlega ekki nógu gott og þar með sætum við á endanum uppi með þingheim sem væri meira og minna óhæfur og lítt til annars fær en að ræða fundarstjórn forseta eða berja hver annan í hausinn með því sem hinir hefðu sagt í fyrra eða hitteðfyrra. Þetta síðastnefnda kallaði hann „annað-hljóð-í-strokkinn-pólitík“.