Loksins skynjar maður að andrúmsloftið í pólitíkinni líkist því að séu að koma kosningar. Og allt í einu sér maður merki þess að kannski verði ekki svo auðvelt að mynda ríkisstjórn eftir kosningarnar í haust. Hér er um að ræða mál sem reka fleyga milli flokkanna sem eru í stjórnarandstöðu.
Nú ganga skeytin vegna uppboðsleiðar í sjávarútvegi. Þingmenn Samfylkingarinnar bauna á Vinstri græna fyrir að hafa afturhaldssama sjávarútvegsstefnu. Fyrst Valgerður Bjarnadóttir, svo Össur Skarphéðinsson sem segir að uppboðsleiðin geti ráðið því hvort hægt verði að mynda ríkisstjórn, hann telur þó að stefnubreytingar gæti verið að vænta hjá VG.
Annað mál sem er eldfimt er lengd næsta kjörtímabilsins. Píratar tala enn fyrir því að kjörtímabilið verði stutt, mynduð verði ríkisstjórn sem hafi það markmið að koma í gegn nýrri stjórnarskrá og kjósa svo aftur svo hún taki gildi.
Þessar hugmyndir eru reyndar umdeildar innan Pírata sjálfra og mæta afar lítilli hrifningu meðal forystumanna annarra flokka. Katrín Jakobsdóttir og Oddný Harðardóttir eru báðar mótfallnar þessu.
En þetta er mál sem getur þvælst verulega fyrir, bæði í kosningabaráttunni og við myndun ríkisstjórnar – og verður eiginlega að fá þetta á hreint áður en gengið er til kosninga. Það er líka spurning hver sé vilji kjósenda – hversu mikilvæg er stjórnarskráin í þeirra huga miðað við til dæmis heilbrigðismál, menntamál og húsnæðismál?