Nú er komið að því að þessi þáttaröð verði sýnd. Hún er samvinnuverkefni mitt, Péturs H. Ármannssonar og Ragnheiðar Thorsteinsson. Pétur er manna fróðastur um byggingasögu á Íslandi, Ragnheiður flestum fremri í að framreiða myndefni í sjónvarpi.
Steinsteypuöldin er fimm þættir. Við veljum ártöl á tuttugustu öldinni og rekjum sögu arkitektúrs og skipulags í gengum þau eða árin þar í kring.
Hið fyrsta er 1915, ár Reykjavíkurbrunans mikla, þegar menn hættu mestanpart að byggja úr timbri og öld steinsteypunnar gekk í garð.
Næst er það 1930, þegar Ísland var orðið fullvalda, Guðjón Samúelsson teiknaði stórhýsi og leitaði að þjóðlegum byggingastíl. En módernisminn er þá líka farinn að láta á sér kræla.
1945 er árið þegar stríðinu lýkur, borgin var að þenjast út fyrir Hringbrautina, það var mikill húsnæðisvandi og fyrstu blokkirnar voru byggðar. Kirkjur sem voru í byggingu á þessum tíma ollu deilum.
1960 er tíminn þegar fagurfræði módernismans verður mjög ríkjandi, frá þessu skeiði eru til dæmis hús sem Sigvaldi Thordarson teiknaði. Þarna gerðu menn ráð fyrir að mestallur gamli bærinn yrði rifinn og lagðar stórar bílabrautir þar í gegn.
1975 eru menn að byggja upp í Breiðholti. Fyrst rís Neðra-Breiðholt, svo Efra-Breiðholt, loks Seljahverfið. Þessi hverfi eru ólík. En það er líka á þessum tíma að baráttan fyrir húsvernd er að hefjast, fyrst við Bernhöftstorfuna.
Fyrsti þáttur Steinsteypualdarinnar er á dagskrá fimmtudagskvöldið 1. september klukkan 20.10.