Ég játa, ég missti af leiknum í gær. Fór á tónleika með Paul McCartney í Berlín. Ég veit samt hvernig fór í leiknum – þetta voru ágæt býtti. Ætli fari ekki að koma að því bráðum að maður getur ekki séð upprunalegan Bítil á sviði.
Það var samt ekki að sjá á Paul sem lék við hvern sinn fingur. Hann verður 74 ára á laugardaginn. Spilaði ýmist á bassann sinn, tvö píanó, rafmagnsgítar og kassagítar. Hóf leik rétt rúmlega átta og hætti ekki fyrr en klukkan var langt genginn í ellefu. Þegar hann var búinn að syngja Live and Let Die og Hey Jude hélt maður að hann myndi hætta. En þá kom hann aftur og söng Yesterday, Hi Hi Hi og Birthday. Og aftur og söng þá Golden Slumbers og lokin á Abbey Road-svítunni.
Þetta voru afskaplega glaðir og kærleiksríkir tónleikar úti í skógi, í Waldbühne, sem er frábært útisvið, nokkuð austan við Ólympíuleikvanginn í Berlín. Það hafði rignt dálítið um daginn en veðrið var fullkomið meðan á tónleikunum stóð.
Ég er að verða gamall og viðkvæmur og játa að það birtust hjá mér tár á hvarmi þegar Paul söng Let it Be og líka þegar hann lék Something, lag félaga síns, Georges Harrison. Þessi tónlist hefur verið svo stór partur af lífi manns alveg frá blautu barnsbeini – við nánast hvert lag rifjast upp fólk, staðir og atvik.
Og svo er eitthvað við hana sem mér fannst sérlega mikilvægt í gær: Hún er full af gleði og kærleika; þarna er að baki frjó sköpun sem á sínum tíma viðurkenndi engin mörk, húmor, ég fattaði í gær hvað Back in the USSR er hrikalega fyndið lag – hún boðar ást og frið, og skammast sín ekkert fyrir það. Hlutir sem sárvantar í samtíma sem einkennist alltof mikið af hatri og reiði.
En svo er þetta mikið skóglendi að þegar við Kári vorum að ganga ásamt fleira fólki frá tónleikastaðnum komu allt í einu fjögur villisvín út úr skógarrjóðri, fóru yfir veginn og hurfu aftur meðal trjánna.
Lögin sem McCartney spilaði í gærkvöldi: A Hard Day’s Night, Save Us, Can’t Buy Me Love, Letting Go, Temporary Secretary, Let Me Roll It, I’ve Got a Feeling, My Valentine, Nineteen Hundred and Eighty Five, Here There and Everywhere, Maybe I’m Amazed, We Can Work It Out, In Spite of All the Danger, You Won’ See Me, Love Me Do, And I Love Her, Blackbird, Here Today, Queenie Eye, New, The Fool on the Hill, Lady Madonna, FourFiveSeconds, Eleanor Rigby, Being for the Benefit of Mr. Kite, Something, Ob-La-Di, Ob-La-Da, Band on the Run. Back in the USSR, Let it Be, Live and Let Die, Hey Jude, Yesterday, Hi, Hi, Hi, Birtday, Golden Slumbers, Carry That Weight, The End.
