Framsóknarmönnum er vandi á höndum á miðstjórnarfundi flokksins sem fer fram á laugardag. Þeir þurfa að fara að ákveða hvernig þeir ætla að haga málum sínum fram að kosningum.

Hver á að leiða flokkinn, Sigurður Ingi Jónsson forsætisráðherra, Sigmundur Davíð Gunnlaugsson formaður eða nýja vonarstjarnan Lilja Alfreðsdóttir?

Hermt er að framsóknarmenn séu afar tvístígandi gagnvart þessu.

Það hefur auðvitað komið fram að innan flokksins er mikil andstaða gegn kosningum í haust. Það eru margir sem eiga á hættu að missa þingsæti sín.

En það er erfitt að hætta við. Starfsáætlun þingsins næsta misserið tekur mið af kosningum sem væntanlega yrðu haldnar seinni partinn í október. Sjálfstæðisflokkurinn er kominn á fullt skrið með kosningaundirbúning, þar á bæ er boðað til prófkjara – flokksmenn telja sig eiga góða möguleika í kosningunum.

Á miðstjórnarfundinum kemur væntanlega í ljós hversu hörð mótspyrnan við kosningar verður innan Framsóknar – og hvort slær alvarlega í brýnu milli Framsóknar og Sjálfstæðisflokks um þær.

Að endingu myndi alltaf koma í hlut forsætisráðherra að rjúfa þing og boða til kosninga. En ef Framsókn vill það ekki? Þyrfti þá Sjálfstæðisflokkurinn að knýja fram kosningar ásamt stjórnarandstöðunni í haust?

Í því sambandi má benda á að stjórnarandstöðuflokkarnir eru kannski ekki allir jafn áfjáðir í kosningar. Samfylkingin er í fullkomnu óvissuástandi, líf hennar stendur tæpt, Björt framtíð virðist ætla að þurrkast út, Vinstri græn eru á siglingu – en í stað nokkurs fjölda þingmanna sem nú sitja kemur líklega nokkur fjöldi Pírata úr kjördæmum landsins.