Eftir förina að Bessastöðum brast trú Framsóknarmanna að þeir gætu haldið áfram með formann sinn. Hann brást líka trúnaði þingmanna með því að segja þeim ekki frá fyrirætlunum sínum. Vinslit virðast hafa orðið með Sigmundi Davíð og fyrrum verndara hans, Ólafi Ragnari Grímssyni. Bjarni Benediktsson er líka mjög harðorður í garð Sigmundar og segir að hann hafi viljað hafa þingrofsheimild til að „veifa framan í mig“. Fundur þeirra í morgun hefur ekki verið í neinu bróðerni.
Framsóknarmenn dúkka upp með lausn sem ég nefndi í pistli í fyrradag, að skipta Sigmundi út og halda áfram með annan forsætisráðherra.
Fyrir valinu verður Sigurður Ingi Jóhannsson. Hann er varaformaður flokksins, fyrsti þingmaður Suðurkjördæmis þar sem hann er sterkur, dýralæknir.
Sigurður er ekki líklegur til að afla fjöldafylgis, en það eru heldur ekki nein sérstök vandræði sem fylgja persónu hans. Hann á örugglega ekki reikning á aflandseyju.
Formúleringin er að Sigmundur Davíð verði áfram formaður flokksins. Spurning er hvað það þýðir. Telja Framsóknarmenn að hann geti áfram verið í fremstu línu og það jafnvel í baráttunni fyrir kosningar sem verða í síðasta lagi vorið 2017?
Sjálfstæðismenn hafa enn ekki fallist á þetta, en frekar finnst manni líklegt að þeir geri það. Bjarni Benediktsson er sjálfur í of erfiðum málum til að krefjast forsætisráðuneytisins, hann segist heldur ekki gera það, og kosningar virka varla aðlaðandi fyrir hann á þessum tíma. Það getur líka gerst eins og Össur Skarphéðinsson segir að Sigmundur vonist til þess að komi fram upplýsingar á næstunni sem eru neyðarlegar fyrir forystu Sjálfstæðisflokksins.
Þetta gæti auðvitað verið millileikur og boðað yrði til kosninga í haust. Það er samt freistandi fyrir flokkana að sitja einn vetur enn og geta haft tíma til að útdeila gæðum úr ríkissjóði fyrir kosningar og efla þannig fylgið.
Það er svo spurning hvort þetta nægi til að lægja öldurnar. Helgi Hrafn pírati segir að enginn á mótmælunum hafi kallað eftir Sigurði Inga sem forsætisráðherra. Það er örugglega rétt. Því verður þó ekki breytt að ef þessi útfærsla verður ofan á hafa Framsókn og Sjálfstæðisflokkur áfram traustan þingmeirihluta.