Sonur minn er í Landakotsskóla svo ég hef gaman af þessari mynd sem sýnir börn að leik við Landakotsskóla árið 1929. Flest er breytt, en ég hef séð börn leika sér á svipaðan hátt á þessu svæði. Þau eru þó ekki í matrósafötum lengur eins og tveir drengir á myndinni.
Myndin er tekin í vesturátt, við horfum út að sjónum og það er lítið búið að byggja þar sem nú eru Hofsvallagata, Hávallagata, Sólvallagata og Ásvallagata, hvað þá á Melunum eða Gröndunum.
Hann er dálítið merkilegur þessi steinveggur á myndinni, með stóru hliði. Það virkar eins og innan hans sé kálgarður. Kannski kunna einhverjir lesendur skil á þessu mannvirki?
Lengra má sjá lágreist timburhús á stangli. Það er erfitt að átta sig á því hver þeirra standa lengur, en þarna er enn að finna eitt og eitt timburhús innan um byggðina.
