Þessa ljósmynd tók Kristján Frímann inn um gluggann á Geysi fyrir fjörutíu árum og birtir hana undir textanum: Allt fyrir herrann í Geysi 1976. Kristján gaf mér leyfi til að birta myndina.
Þessum Geysi ber ekki að rugla við Geysi sem nú er á Skólavörðustíg. Búðin var á horni Aðalstrætis og Vesturgötu, þar sem nú er m.a. Hönnunarmiðstöð Íslands. Verslunin starfaði til 1992, en þá keypti borgin húsið og lét gera það upp. Var þá meðal annars fjarlægð forskalning sem var utan á húsinu.
Í Geysi fékkst nokkuð alþýðlegur fatnaður, ekki sérlega dýr, en í búðinni voru einnig seld veiðarfæri og fleira slíkt. Í gluggaútstillingunni frá 1976 eru náttsloppar og náttföt mest áberandi, bæði á drengi og herra, en það sem vekur ekki síst athygli er rakspírinn sem er stillt út neðst á myndinni.
Þarna má sjá hinn eina sanna Old Spice í gjafaöskju. Þetta var ilmur sem karlmenn eftirstríðsáranna notuðu – hann var að sönnu nokkuð einstakur. Má jafnvel segja að hann hafi verið ágengur. En til hægri á myndinni má sjá hvernig annar rakspíri, Tabac, sækir á. Hann er ekki eins eftirminnilegur.