Þessi texti er settur saman af Matthíasi Kristiansen, kennara, þýðanda og tónlistarmanni. Þetta er ágætis áminning þegar renna upp jól á umbrotasömu ári.

Sennilega einkennist engin hátíð manna jafn mikið af fjölmenningu og jólin. Við höldum upp á fæðingu barns foreldra á ferðalagi í Austurlöndum nær með því að draga inn í hús grenitré að þýskum sið, förum með börn að hitta jólasveina sem eru sambland tyrkneskrar, hollenskrar, norskrar og bandarískrar Coca-Cola hefðar, gefum gjafir að sið austrænna vitringa, syngjum söngva víða að við undirleik á hljóðfæri smíðuð um allan heim, skálum í vínum frá Frakklandi, Spáni eða Chile og ökum að verslunum í japönskum eða þýskum bílum knúnum rússnesku bensíni.

Við kveikjum á kertum framleiddum í Svíþjóð eða á ljósaperum frá Kína, bragðbætum eftirrétti með vanillu frá Madagaskar eða banönum frá Mið-Ameríku, kveikjum kannski í vindli frá Kúbu eða fáum okkur kaffi frá Kólumbíu. Appelsínurnar og ferska kryddið eru frá Ísrael, piparinn frá Indlandi, kanillinn frá Sri Lanka og lárviðarlaufin frá Miðjarðarhafslöndum. Heitið jól er komið úr heiðni.

Um áramótin skjótum við svo upp flugeldum frá Kína.