Þessi jólalega ljósmynd er tekin í Austurstræti í kringum 1970. Gatan er ansi mikið breytt síðan þá. Fremst á myndinni til hægri er hús Ísafoldar sem síðar var flutt í Aðalstræti. En þarna var bókabúð á þessum tíma, við sjáum auglýsingu fyrir skáldsöguna Hnefaleikarann eftir Jack London sem kom út 1969.
Ég verð að viðurkenna að ég man ekki nógu vel eftir öllum verslunum þessa tíma – þótt ég væri farinn að þvælast um Miðbæinn. Mér sýnist að við hliðina á Ísafold sé búð sem nefnist Raflux, raftækjaverslun, en á skiltinu eru líka auglýstir Souvenirs, minjagripir, þar er semsagt fyrirboði um tíma sem komu löngu seinna.
Í húsinu þar við hliðina á stendur svo Gefjun stórum stöfum. Þarna var vöruhús Sambands íslenskra samvinnufélaga – húsinu hefur verið mikið breytt og þarna er nú útibú ÁTVR.
Hinum megin við götuna má sjá ljósaskilti fyrir verslunina Oculus, en þar voru seldar snyrtivörur. Lengra er svo verslun Egils Jacobsen, en ég sé ekki alveg hvað stendur á skiltunum innar í götunni.
Kannski geta minnugir lesendur rifjað upp hvað fleira var þarna. Úr æsku er mér reyndar minnisstæðust ísbúð sem nefndist Ísborg sem var í Austurstrætinu, hún var mjög glæsileg eins og sjá má á þessari ljósmynd – en ég var ekki gamall þegar hún lokaði. Það er líklega fyrsta búðin þar sem voru seldir mjólkurhristingar að amerískum sið.
Myndin hér að neðan er af vefnum Gamlar ljósmyndir.